Accessibility links

пәнҗешәмбе, 8 декабрь 2016, Казан вакыты 23:19

Mädäniät xäbärläre


Şimbä könne Ğäliäskär Kamal isemendäge Tatar däwlät akademiä teatrında yäş şağirä, küp sandağı cır avtorı Läylä Däwlätova “Yäşiseñ kilep yäşä” isemle icat kiçäsen ütkärde. Tumışı belän Aqtanış rayonınnan bulğan Läylä Däwlätova mäktäpne tämamlap, Qazan däwlät universitetınıñ jurnalistika, psixologiä häm sotsiologiä fakul'tetında belem ala. Bügen ul “Yaña ğasır” telekanalında “Adäm häm Hawa” tapşıruınıñ möxärrire häm alıp baruçısı. Ber yıl eçendä bu tapşırunı alıp barıp dan qazandı. Bıyıl anıñ cırlarınnan torğan berençe al'bomı da dönya kürde. Däwlätova konsertında anşlag, basıp torır öçen dä urınnar yuq ide. Xalıq şığrım tulı buldı.

Cırçılardan Salawat Fätxetdinov, Venera Ğänieva, Miñğol |Ğäliev kebek cırçılar tamaşaçınıñ küñelen kürde. Gölnara Timercanova, Çulpan Mortazina kebek yäş populyar cırçılarnıñ qatnaşuı da konsertnı yämläde. Läylä Däwlätova üz cırların üze dä başqardı. Konsertnı Cäwid Şakirov belän Şämsi Zakirovlar alıp baruı da tamaşaçığa bik oşadı. Ämma, Konsertta cırlıy dip kötelgän Xämdünä Timerğälieva, Xäniä Färxi, İlsaf kebek tamaşaçı yaratqan, tanılğan cırçılar bulmawı ,älbättä, tamaşaçınıñ käyefen qırdı. 4-5 säğätlek konsert tıñlarğa öyrängän qayber tamaşaçı Läylä Däwlätovanıñ 2 säğätlek kiçäsenä qänäğätsezlek belderde. Konsert bik qısqa dip zarlanuçılar oçradı. Qaya Xäniä Färxi, Xämdünä dip açulanğan tamaşaçılar üz kumirların kürergä kilgännär.

Eş anda ğına tügel, älbättä, yäş şağiräneñ icatı, tormış yulı kübräk kürsätelsä, ruxi yaqtan susağan tamaşaçılar üzläre öçen azıq tabar ide. Mäxäbbät turında şiğerlär ber waqıtta da tuydırmawı ser tügel bit. Ägär konserttan soñ beraz cäncal çıqqan ikän, annan da yäş şağirägä, reklama, üzençä ber uñış. Ğomumän alğanda, üzeneñ 25 yäşlegen Kamal teatrı säxnäsendä icat kiçäse belän bäyräm itkän şağir yäki sänğätkärne Qazan xäterlämi äle. Läylä Däwlätova bu kiçäne oyıştırıp, qıyulıq kürsätkän çaya qız bularaq istä qalaçaq. Şiğriätkä, sänğätkä Salawat kebek görläp kilep kerüçe qızlarıbız bar bezneñ.

“Tuğan tel” klubı Ğabdulla Tuqay muzeyında çärşämbe könne Ğabdulla Tuqaynıñ zamandaşı, bay ädäbi miras qaldırğan şağir, publitsist, pedagog Näcip Dumavinıñ tuuına 120 yıl tuluğa bağışlanğan kiçäsen uzdıruğa cıyılğan aqsaqallar kübräk Salix Säydäşev icatı turında söyläştelär. Näcip Dumavi kiçäse turında “Tuğan tel”neñ ikençe utırışında qararğa buldılar.

20 oktäber könne Kärim Tinçurin isemendäge Tatar däwlät drama häm komediä teatrında Tatarstannıñ atqazanğan artistı, TR däwlät cır häm biü ansambleneñ möxtäräm cırçısı Färit Mirzanurovnıñ icadi eşçänlegenä 30 yıl tuluğa bağışlanğan zur konsert uzdı. Konsertta tanılğan artistlar çığış yasadı.

21 oktäber könne TR Milli kitapxanäsendä Rossiä töbäklärendä tatarlarğa xezmät kürsätüçe kitapxanä xezmätkärläreneñ Töbäqara seminarı başlana.

Mälikä Basir, Qazan

XS
SM
MD
LG