Accessibility links

якшәмбе, 11 декабрь 2016, Казан вакыты 15:05

Ğosman xäzrät İsxaqi Çeçnya prezidentınıñ wazifağa kerü tantanasında qatnaştı


Malayziä Tatarstannan yıraq bulsa da, anda bulğan islam illäre konferensiäseneñ qaytawazı mondağı tormışqa da tä’sir itä. Şuşı könnärdä Malayziädä bulğan Tatarstan Parlamentı räise Färit Möxämmätşin jurnalistlar belän oçraştı, häm şuşı ekzotik ildän alğan tä’sirlär belän büleşte. Söyläşüdä süz islam dine häm anıñ doşmannarı turında ğına tügel, federalizm, Çeçnyä belän Tatarstan arası häm tärcemä citeşsezlekläre xaqında da bardı.

Putradjayadan Qazanğa qaytqaç, Färit Möxämmätşin barısın da bäynä-bäynä söyläde. Malayziädä konferensiädä qatnaşudan tış ul yaña saylanğan Çäçän Prezidentı Äxmät Qadırov belän dä söyläşkän. Tatarstan modele Çeçnya respublikası öçen dä qaralğanğa kürä, Äxmät Qadırov Federal Üzäk belän şartnamä tözü häm büdjet-ara mönäsäbätlär urnaştıru turında Tatarstan fikere belän dä qızıqsınğan ikän. Färit Möxämmätşinnıñ äytüenä qarağanda, Çäçän yağı cielğan salımnarnıñ barısın da respublikalarında qaldırırğa teli. Tatarstan parlamentı räise isä Federal Üzäkneñ moña rizalaşuına şik beldergän.

Qazandağı ber gäzit yazğança, kem-kem ä Färit Möxämmätşin Federal Üzäk belän niçek söyläşülär alıp barasın belä. Salımnar urınına parlament räise Çeçnyäne torğızu öçen federal programma buldırırğa kiñäş itkän. Äxmät Qadırovqa anıñ süzläre tä’sir itkänme, yuqmı, älegä bilgesez. Şuşı oçraşuda Tatarstannıñ üz wäkilenen Çäçnä Prezidentınıñ wazifağa kerü tantanasına cibärü xaqında süz barğanmı yuqmı şulay uq mäğlüm tügel. Ämma Tatarstan möftie Ğosman xäzrät İsxaqinıñ şuşı çarağa Gudermesqa kitep baruı bilgele. Ğosman xäzrät äle säfärdän qaytıp citmägän ikän. Äytergä kiräk, möfti ozaq yıllar buyı Tönyaq Kawqaz möftiläre belän duslıq saqladı. Tatarstan Diniä Näzaräte xezmätkärläreneñ äytüenä qarağanda, bu yulı da möfti Ğosman xäzrät İsxaqov Çäçän Prezidentı Äxmät Qadırovnıñ şäxsi çaqıruı belän kitte.

Küñelsez yaqlar xaqında jurnalistlar oçraşuında süz barmadı, ämma alar bulğan. Malayziädä Rusiä delegatsiäsen yuğarı däräcädä qabul itü xaqında söylänsä dä, bezneñ çığanaqlar xäbär itkänçä qunaqlar arasında ükeneç belderüçelär dä bar. Konferensiä tämamlanğannan soñ, Rusiä Prezidentı häm anıñ yärdämçeläre yaña ber säfärgä çığıp kitkän. Ä anıñ belän bergä kilgän möselman respublikaları citäkçeläre forum ütkän Putradjaya şähärendä utırıp qalıp, üz könnären üzläre kürergä mäcbür bulğan.

Bikä Timerova, Qazan

XS
SM
MD
LG