Accessibility links

шимбә, 10 декабрь 2016, Казан вакыты 21:41

Qazanda "Tellär forumı" bara


21 oktäber könne üz eşen başlağan bu forum "Globalizatsiä häm milli üzençälek. Tellär forumı" dip atala. Anıñ küpsanlı oyıştıruçıları arasında Tatarstan xökümäte, Qazan şähäre xakimiäte, Sakura isemle tatar-yapon mädäni-mäğlümäti üzäk häm Tatar eşmäkärlege – TİSBİ institutı bar. Älege xalıqara çara milli tellärne, mädäniätlärne öyränü, alarnı propagandalaw, milli üzençäleklärne saqlap qalu yulların ezläw, şulay uq yäşlärne törle çit il tellären, başqa mädäniätlärne öyränergä etärü maqsatınnan ütkärelä. Oyıştıruçılar bu forum şuşı ölkädä eşläwçe ictimaği oyışmalar häm waqıflarnıñ törle programmaların, grantların täqdir itärgä mömkinçelek dip tä sanıy. Konferensiädä qatnaşır öçen Rusiäneñ töbäklärennän genä tügel, ä Törkiä, Yaponiä, Qazaqstan ğalimnäre dä kilde. Şulay uq forum çaralarında bu könnärdä Qazanda räsmi säfär belän yörüçe Yaponiä ilçelegeneñ wäkilläre, Törkiäneñ Tatarstandağı wäkilçelegeneñ xezmätkärläre dä qatnaştı.

Tellär forumı bıyıl äle berençe märtäbä genä ütkärelä. Xäyer, oyıştıruçılar anıñ ozın ğömerle bulıp, kiläçäktä här yılnı ütkäreläçäk cıyılışqa äylänüenä ışana. Alarnıñ fikerençä, här yılnı forum berär ilgä yäki berär waqiğağa bağışlanaçaq. Bıyıl ul 2003 yılda Törkiä respublikasına 80 yıl tulu uñayınnan şuşı ilgä bağışlandı. Şuña da inde, forumda töp çaralar näq menä şuşı temağa arnalıp ütte. Globalizatsiä häm milli üzençälek forumı şulay uq Tatar eşmäkärlek – TİSBİ institutınıñ UNESCO kafedrası eşli başlawınıñ 5 yıllığına da bağışlanğan. Äytep ütärgä kiräk, älege kafedra şaqtıy uñışlı eşläp kilä. Qazan şähäreneñ UNESCO oyışması belän tığız elemtälären iskä alğanda, bu ber dä ğäcäp tügel älbättä. Süz uñayınnan şunı da äytep kitik, Rusiäneñ UNESCO qarşındağı daimi wäkile Vladimir Kalamanovnıñ Tatarstan prezidentı Mintimer Şäymievkä yullanğan xatında, Qazannıñ meñyıllıq yubileyı UNESCOnıñ istälekle datalar Kalendarenä kertelgän, dielä. Bu xaqta oyışmanıñ şuşı könnärdä genä tämamlanğan general’ konferensiäseneñ 32 sessiäsendä xäl itelgän.

Xäyer, yazmabıznıñ töp teması - Tellär forumına kire qaytıyq äle. Älege konferensiä qısalarında sişämbe könne tellär öyränü buyınça däreslär kürsätelde, qızıqlı metodikalar nigezendä master-klasslar oyıştırıldı. Şulay uq forum qısalarında törle illär häm xalıqlar, millätlärgä bağışlanğan kürgäzmälär eşli, fänni çığışlar yasala, plenar utırış ütä. Bu çaralar TİSBİ institutında, Qazannıñ 18 mäktäbendä, 3 sanlı häm törek gimnaziälärendä uza. Tellär forumı üz eşen çärşämbe, 22 oktäber könne dä däwam itäçäk.

Gölnaz İlgizär, Qazan

XS
SM
MD
LG