Accessibility links

Respublika byudjetında östämä kompensatsiäne kimetmäs öçen aqça tabılırmı?


Hönär berlekläre byudjet sisteması xezmätkärläreneñ eş xaqın çınnan da 33% arttıru öçen daimi räweştä qarşılıq çaraların ütkärü xaqında iğlan itkän ide. 17nçe üktäberdä, Däwlät Şurası qarşında ütär dip planlaştırılğan piket bulmıy qaldı. Hönär berlekläre federatsiäsendä beldergänçä, şuşı ictimaği köç häm xökümät üz ara kileşep, bu mäs’äläne berär niçek xäl itärgä söyläşkän.

Belgänegezçä, Tatarstanda byudjet oyışmasında eşläwçelärneñ eş xaqları berdäm tarif çeltäre sannarı häm respublika byudjetınnan tülänä torğan östämä aqça – kompensatsiädän tora. Tatarstan respublikası xökümäte şuşı yılıñ 9nçe üktäberendä çığarğan qararında 1nçe üktäberdän bilgelänä torğan yaña tarif çeltäre sannarı täqdim itte. Mäsälän, iñ tübän razryadlı xezmätkärlär 600 sum tiräse alaçaq, 10nçıdan alıp 13nçegä qädär eş xaqı - 1 400 sumnan başlap 1800 sum däräcäsendä bilgelänä. İñ yuğarı 18nçe razryadta 2700 sumlıq eş xaqı turı kilä. Östämä kompensatsiä tüläwläre 1nçe razryadta 415 sumnan başlana, annan soñ kimi başlıy häm iñ yuğarı basqıçta 234 sumğa qädär töşep citä.

Tatarstanda yäşäw minimumı 1800 sum tiräse dip isäplänä. Bügen Tatarstanda yäşäw minimumınnan tübänräk däräcädä respublika xalqınıñ 18% yäşi ikän. Bu sotsial häm iqtisadıy tikşerenülär üzäge mäğlümatları ide. İnde eş xaqın qarıyq:

şuşı artu näticäsendä byudjet çeltärendä eşläwçeneñ 10nçı-14nçı razryadı bulsa, anıñ eş xaqı - 1700-2200 sum tiräsendä bula. Bu sannar da yäşäw minimumınnan ällä ni artmıy .

Sişämbe könne kiç, Tatarstanıñ «Yaña ğasır» televideniese efirında deputat Oleg Morozov çığış yasap, şuşı mäs’äläneñ xäl itelü mömkinlegenä işärä yasadı. Anıñ süzlärençä, xökümättä häm parlamentta respublika byudjetınnan tülänä torğan kompensatsiälärne kimetmiçä, elekke däräcädä saqlaw yulların ezlilär. Bu oçraqta, Tatarstanda tulayım sanağanda eş xaqı 33% artaçaq.

Mäğlüm bulğança, Tatarstan Däwlät Şurası respublika byudjetın 1nçe uqılışta ğına qabul itte. Byudjet oyışmaları xezmätkärlärenä kompensatsiä tüläwlären kimetmäw mömkinlege xaqında bügen räsmi oyışmalardan cawap alıp bulmadı. Şuña bu temanı aldağı tapşırularda däwam ittererbez.

Bikä Timerova.



XS
SM
MD
LG