Accessibility links

шимбә, 3 декабрь 2016, Казан вакыты 12:46

Mintimer Şäymiev saylaw aldı yalına kitte


Yaponiäneñ Rusiädäge wäkälätle wäkile İssey Nomura citäkçelegendäge räsmi delegatsiä bu könnärdä Tatarstan belän tanıştı. Sişämbe könne ilçene Tatarstan prezidentı Mintimer Şäymiev qabul itte. Oçraşu waqıtında süz Yaponiä belän Tatarstan arasındağı xezmättäşlekne üsterü yulları turında bardı. İsegezgä töşerep ütik, 2000nçe yılnıñ sintäber ayında Mintimer Şäymiev Rusiä prezidentı Vladimir Putin belän Yaponiädä bulıp qaytqan ide. 21nçe oktäber könne ütkän oçraşuda Tatarstan prezidentınıñ şuşı vizitı näticäläre bulğan kileşülär xaqında da söyläşende. Ayırım alğanda, respublika belän Yaponiä arasındağı xezmättäşlek neft’, nefteximiä, energetika, energiä saqlaw, innovatsion texnologiälär ölkäsendä uñışlı, dip sanala. Şulay uq, oçraşuda süz ike aradağı fän, mädäni bağlanışlarnı üsterü turında da bardı. Yaqlar yäşlär belän almaşu programmaların kiñäytü, Qazanda eşläp kilüçe Sakura isemle Yapon mädäni-mäğlümäti üzäkneñ eşçänlegen kiñäytü xaqında da kiñäşläştelär. Şulay uq, Qazannıñ meñyıllığın bäyräm itügä äzerlek programmasınıñ xalıqara öleşe qısalarında, 2004nçe yılda Yaponiädä Qazan könnären ütkärü niäte dä belderelde. Bu fikerne İssey Nomura da xupladı.

Qazanda “2010nçı yılğa qädär Rusiä tözeleş kompleksınıñ üseş strategiäse” digän kiñäşmä üz eşen tämamladı. Anda Rusiäneñ Tözeleş buyınça däwlät komitetı räise Nikolay Koşman, Tatarstan prezidentı Mintimer Şäymiev qatnaştılar. Şuşı çaralardan soñ, 22nçe oktäber könne, Mintimer Şäymiev saylaw aldı yalına kitte.

XS
SM
MD
LG