Accessibility links

пәнҗешәмбе, 8 декабрь 2016, Казан вакыты 23:14

Yekaterinburgta sälätle tatar balaları yañadan cıyıldı


Küptän tügel Yekaterinburg şähäreneñ Tınıçlıq häm Duslıq yortında sälätle balalarnı sälimläw kiçäse bulıp uzdı. Xäteregezgä töşerep ütik: ütkän yazda inde ber yıldan artıq eşläp kilgän Milli Media-Xolding citäkçeläre, Sverdlov ölkäsendä yäşäwçe tatar balaları arasınnan iñ sälätlelären, tormışta inde tege yäki bu uñışlarğa ireşkännären saylap alıp, alarğa “Sälätle bala – 2003” tanıqlığın tapşırğan ide. Şulay uq uqu yılı axırına qädär ay sayın alar belän oçraşu kiçäläre oyıştırılıp, här balağa keçkenä genä bulsa da üzenä kürä ber stipendiä dä bilgelängän ide.

Cäyge yal waqıtında andıy kiçälär bulmıy tordı. Häm menä oktäber ayında älege oçraşular yañadan başlandı.

Oçraşmıy torğan dürt ay eçendä küp kenä üzgäreşlär bulıp uzğan. Mäktäpne kömeş medal' belän tämamlağan Al'bina Şäydullina, bik zur konkurslarda ciñep, beryulı ike yuğarı uqu yortına tüläwsez nigezdä uqırğa kergän. Muzıka uçilişçesın iñ yaxşı bilgelärenä genä tämamlağan Dilizä Nadıyrova konservatoriä studentı bulu bäxetenä ireşkän. Qıya-tawğa menü buyınça yäşlär arasında ike märtäbä dönya çempionı bulğan Anya Ğallämowa da bıyıl yuğarı uqu yortına uqırğa kergän.

Kiçägä cıyıluçılar bu yuğarı uñışlarğa ireşkän dusların köçle alqışlar belän täbriklädelär. Qalğannarı äle mäktäp yäşendä, şuña kürä bu yıl mäktäpne tämamlap, kiläçäkkä turı yul saylawçı balalar alar öçen ürnäk bulıp torırlıq. Kiçä barışında alarğa matur süzlär, teläklär küp äytelde. Mäktäpne tämamlap, olı tormış yulına ayaq basuçı yäşlär urınına yaña almaş kilde – Milli Media-Xolding xezmätkärläre, sälätle yäş millättäşlärebez safın tulılandıru öçen zur eş alıp barğannar. Xolding stipendiatları xäzer elekkege un urınına unsigez.

Bügen oyıştırılğan kiçägä alar äti-äniläre, dusları belän kilgännär. Kiçäneñ qunaqları bulıp şulay uq ölkän yäştäge tatar uqıtuçıları Nailä apa Moksunova, Sawadıy ağa häm Zahidä apa Äxmätovlar, ölkäbezneñ tatar milli xäräkäte veteranı Söfxät ağa Nadıyrov, bu yıl Bolğariädä xalıqara bäygedä ciñep qaytqan xudojnik-model'yer Razia Urazayeva, mäğärif üsterü institutı xezmätkärläre, tatar eşmäkärläre häm başqalar çaqırılğan ide.

Şunısı quanıçlı, balalar kiçäne tulısınça üzläre oyıştırıp alıp bardılar. Üzara täbrikläw süzläre arasında alar başqaruında törle tellärdä matur cırlar yañğıradı.

Annan soñ balalar kiçäneñ ölkän yäştäge qunaqların häm uqıtuçılarnı oktäber ayında bilgelänep ütelgän ölkännär köne häm uqıtuçılar bäyräme belän täbrik itep, alarğa büläklär tapşırdılar.

Tuğannan başlap rus moxitında yäşäp, rus mäktäplärendä belem aluçı tatar balalarınıñ kiçäne rus telendä alıp baruları ğäcäplänerlek tügel, anısı. Şulay bulsa da, Söfxät ağa Nadıyrov alarğa ütkän oçraşuda tuğan telne öyränä başlarğa wäğdä birülären iskä töşerep ütte:

Tuğan teldä şoma itep söyläşä belmäsälär dä, öygä eş itep birelgän “Tuğan tel” cırın balalar äybätläp öyrängännär. Kiçägä cıyıluçılar ayağürä basıp xalqıbıznıñ küñel gimnın başqarğan çağında, balalar bik teläp quşıldılar.

Biredä şulay uq balalarğa çirattağı stipendiäne öläştelär, alarğa millätebezneñ danın üsterüdä üzlärennän layıqlı öleş kertülären telädelär. Annan soñ tügäräk çäy östäle yanında matur itep aralaşıp utırdılar. Kiçäneñ qunaqları şundıy faydalı oçraşular oyıştıruları öçen Milli Media-Xolding citäkçelärenä olı räxmät belderdelär.

Fäwiä Safiullina. Yekaterinburg.

XS
SM
MD
LG