Accessibility links

шимбә, 10 декабрь 2016, Казан вакыты 10:04

General Boykinneñ islam dinen kimsetep yasağan belderüläre baş inspektor tarafınnan tikşereläçäk


İslam dine häm möselmannar turında şikle belderülär yasağan amerikan generalı tiräsendäge ğawğa hiç tınmıy, xörmätle tıñlawçılar. Quşma Ştatlarnıñ saqlanu ministrı Donald Rumsfeld şul generalnıñ süzlären maxsus tikşeräçägen xäbär itte. Anıñ süzlärenä qarağanda, älege üteneç belän general üze çıqqan.

Yuğarı däräcäle amerikan xärbieneñ islam dine turında, qayberäwlär fikerençä, mäsxäräle süzlär äytüwe bar Quşma Ştatlarda yaña bäxäs qabınıp kitügä säbäp buldı. Şuña kürä dä saqlanu ministrı Rumsfeld general Boykin belderüläreneñ maxsus räweştä tikşereläçägen belderä. Sişämbedä Pentagonda uzğan matbuğat oçraşuwında xäbärçelär bu xaqta aña maxsus soraw birgän ide. Donald Rumsfeldnıñ cawabı mondıy buldı.

Audio, Donald Rumsfeld

"Ul üze, yäğni general Boykin, baş inspektornıñ monı tikşerüwen ütende. Minemçä, anıñ yağınnan bu ifrat ta cawaplı ber adım. Xäzer närsä bulası inde baş inspektor qaramağında" di Quşma Ştatlarnıñ saqlanu ministrı Rumsfeld. Näq menä ul şikle belderülär yasağan generalnı üzeneñ, küzläw eşlären alıp baru öçen cawaplı urınbasarı itep bilgelägän ide. General Boykin bügenge köndä amerikan xärbiläreneñ Saddam Xösäenne, Osama bin Ladenne ezläw eşlärenä citäkçelek itä. Berniçä kön elek Los Angeles Times basması, üzen xaq xristian dip tanıtırğa yaratqan şuşı xärbineñ terrorğa qarşı alıp barılğan köräş, islam dine, möselmannar turında äytkän süzlären bäyän itte. Misal öçen ul küptän tügel genä, üzeneñ 1993-nçe yılda Somalidäge täcribäsen iskä alıp, andağı ber möselman suğışçısınıñ, amerikannar anı berqayçan da tota almayaçaq, çönki anı Xoday üze yaqlıy dip äytüwen, läkin soñraq amerikannar qulına töşüwen söylägän. Bu uñaydan general Boykin, "min beldem ki, minem Allam anıqınnan böyegräk, häm min üz Allamnıñ çın Alla ikänen, ä anıqınıñ isä barı tik ber pot ikänen dä belä idem" dip beldergän. Anıñ şuşı süzläre xätta tasmağa da yazıp alınğan bulğan.

Audio, general Boykin

Moñardan tış general Boykinneñ berniçä märtäbä, terrorğa qarşı köräş xristiannarnıñ ibliskä qarşı alıp barğan izge suğışı bulıp tora dip äytüwe dä mäğlüm. Anıñ şuşı süzläre Quşma Ştatlar prezidentı George Bushnıñ, Amerikanıñ terror belän köräşe hiç kenä dä islamğa qarşı yünälderelmägän digän belderülärenä ber dä turı kilmi. 11-nçe sintäbr waqiğälärennän soñ prezident üzeneñ ber belderüwendä terrorğa qarşı "täre suğışı" başlaw kiräklegen äytsä dä, ul monı tiz genä tözätergä mäcbür buldı. General Boykinneñ süzläre, amerikan xärbi citäkçelegendä islamğa qarşı käyeflärneñ şaqtıy köçle bulıp qaluwın kürsätä. Üze tiräsendä şuşı ğawğa qupqaç general, "min fanatik ta, extremist ta tügel, min fäqät buysınu imanı bulğan ber ğäskäri genä" dip beldergän ide. Anıñ zur tawış quptarğan, elegräk äytkän süzläreneñ yuğarı däräcäle xärbi citäkçegä kileşü-kileşmäwen tikşerüne baş inspektor idaräseneñ ğäskäri wä saqlanu bülege alıp baraçaq. Saqlanu ministrı Rumsfeld üze general Boykinneñ belderülären şäxsän niçek bäyäläwen äytmäde, ul barı tik monıñ baş inspektor tarafınnan qaralaçağın ğına xäbär itte.

Kärim Kamal, Praga
XS
SM
MD
LG