Accessibility links

шимбә, 3 декабрь 2016, Казан вакыты 12:46

Izrail' Könbatış yarda çik ayıruçı diwar tözelügä qarşı BMO rezolütsiäse qabul itelügä qaramastan tözeleşne däwam itäçägen belderde


BMO Ğömümi Cıyınında 144 uñay, 4 qarşı tawış belän qabul itelgän rezolütsiädä İzrail'neñ bu ğämäle xalıqara qanunnı bozu bularaq ğäyeplänä. İzrail' tışqı eşlär ministrlığı wäkile Daniel Taub bu rezolütsiäne doşmança häm beryaqlı dip bäyäläde. Taub, ägär dä fälestinlelär İzrail'lelärgä qarşı höcümnären tuqtatmasa yul xaritası dip yörtelüçe tınıçlıq planın tormışqa aşıruda tärräqiät bulmayaçaq dide:

AUDİO: Fälestinlelär alğa kitüneñ berdän-ber yulı terrorçılıqnı tuqtatu häm söyläşülär başlaw ikänen belä. Yul xaritası da şunı taläp itä. Ämma alar qabat-qabat, İzrail'gä qarşı doşmança häm beryaqlı rezolütsiälär qabul itterergä tırışıp üzläre avtomatik östenlekkä iä bulğan BMO Ğömümi Cıyınına yögerä.

Bügen İzrail'neñ Eçke eşlär ministrı Tzahi Hanegbi Yähüdlärneñ Xäsrät Diwarı häm İslamda öçençe iñ izge cir Äl-Aqsa mäcete urnaşqan urınğa kilde. Bu turıda Hanegbi annan kitkäç kenä iğlan itelde. Hanegbi ul urınğa kiläse atnadaq başlanaçaq Ramazan aldınnan iminlek şartların tikşerü öçen baruı turında belderde. 2000-nçe yılda bu urınğa Ariel Şaron kilgännän birle İzrail'neñ yuğarı citäkçeläreneñ anda bulğanı yuq ide. Şaronnıñ Äl-Aqsa mäcete yanında kürenüe belän Fälestin kütäreleşe başlanıp kitte häm bäreleşlär bügengäçä däwam itä.

XS
SM
MD
LG