Accessibility links

сишәмбе, 6 декабрь 2016, Казан вакыты 06:07

23nçe üktäberdän tüläwsez efir waqıtı öçen bäygedä qatnaşu öçen ğarizalar qabul itü başlandı


Kem ölgermäde şul töşep qaldı. 22nçe üktäberdä kiçke säğät 6-da deputat bulırğa teläüçe nämzätlärneñ käğäzlären qabul itü tämamlandı. Menä mäsälän, Dmitriy Berdnikov İdel buyı saylaw komissiäseneñ eş säğätläre beter aldınnan ğına bulsa da, kilgän. Ämma käğäzlären tapşıra almağan. Bu xaqta bezgä üzäk saylaw komissiäsendä xäbär ittelär.

Belgänegezçä nämzät anı yaqlap qul quyğan imzalar, keremnär turında maxsus beleşmä häm başqa möhim dokumentlarnı saylaw komissiäsenä täqdim itärgä tieş. Dmitriy Berdnikovnıñ keremnäre turında beleşmäse tärtiptä bulmağan häm ul saylaw aldı zalogın bank aşa küçerep tügel, ä tere aqça belän birergä telägän. Nämzät ber-niçä säğät bäxäsläşsä dä, käğäzlären tapşıra almağan. Yäğni aldağı Duma saylawlarınnan Dmitriy Berdnikov töşep qaldı.

Saylaw aldı komissiäse xezmätkärläre fikerençä, monı nämzät maxsus eşlägän, çönki moña qädär ul bik küp saylawlarda qatnaştı.

Anıñ kebek töşep qaluçılar şaqtıy. Qaysıları dokumentların waqıtında tapşırıp betermägän, ikençelärneñ käğäzlärendä citeşsezlek tabılırğa mömkin. Bügenge köndä inde 13 partiä häm saylaw aldı bloğı terkälü uzğan. Qalğannarınıñ dokumentlarnı tikşerü eşläre 10 kön däwamında baraçaq.

Ä 23nçe üktäberdän başlap däwlät tele-radikompaniälärendä tüläwsez efir waqıtı öçen jiräbägä saluda qatnaşu öçen ğarizalar qabul itü başlandı. Tatarstannıñ Üzäk saylaw komissiäse säyäsi firqälär häm terkälgän nämzätlärgä ğarizaların 31nçe üktäbergä qädär tapşırıp beterergä kiñäş itä. Qanunda äytelgänçä üzäk kanalda nämzätlärgä 1 säğättän, ä töbäk Televidenie häm radiosında 30 minuttan da kim bulmağan tüläwsez efir waqıtı birelergä tieş.

Efir waqıtına östämä şartlar da quyıla. Nämzätlär öçen birelgän säğätläreneñ irtän, yäki kiç, keşe iñ küp qarıy torğan waqıtqa turı kilüe zarur. Cöräbäğä salu 4nçe noyäberdä, respublikanıñ Üzäk saylaw komissiäsendä ütäçäk.

Respublikada «Tatarstan» belän «Yaña ğasır» televidenieläre häm şul isemdäge radiolar däwlätneke dip sanala. Şular belän bergä «Watanım Tatarstan», «Respublika Tatarstan» , «Tatar ile», «Tatarstan yäşläre», «Mädäni comğa» häm başqa respublika gäzitläre dä nämzätlärgä öndäwlär öçen buşlay urın birergä tieş. Şuşı basmalar häm radio-telekanallar tüläwle efir waqıtın da birä ala. Anıñ öçen dä jiräbägä salıp, çığışlar çiratın bilgeläw taläp itelä. Ä saylawçılarğa wäğdälär ağımı 7nçe noyäberdän ağıla başlıy. Äzer bulıp torığız.

Bikä Timerova.

XS
SM
MD
LG