Accessibility links

шимбә, 10 декабрь 2016, Казан вакыты 02:25

Prezident Bushnıñ Awstraliä parlamentı qarşındağı çığışı berniçä märtäbä bülende


Amerika Quşma Ştatları prezidentı George Bush üzeneñ Aziä säfären tämamlap Waşingtonğa qaytıp kitü aldınnan soñğı tuqtalışın Avstraliädä yasadı. Anda ul ilneñ parlamentında zur çığış yasap Ğiraqta häm Äfğanstanda Quşma Ştatlarğa yardäm itüwe öçen Avstraliä xökümätenä räxmät belderde. Läkin amerikan prezidentı anda üzeneñ tışqı säyäsätenä qarşı çığuçılarnıñ da tawışın işette.

Avstraliä parlamentınıñ ike palatası qarşında da yasağan çığışı üzägenä prezident Bush yänä terrorğa qarşı köräşne quydı, xörmätle tıñlawçılar. Menä anıñ çığışınnan ber özek.

Audio, George Bush

"Bez bu doşmanğa qarşı bar köçebez belän köräşergä tieşbez. Terrorçılar dönyasında ber il dä tınıç qına yäşi almayaçaq. Häm ber genä xalıq ta, berär binağa, yäisä oçqıçqa, yä tönge klubqa, yä şähär avtobusına yasalğan höcümnän saqlanmağan. Sezneñ il dä, mineke dä andıy tetränüne wä qayğını kiçergän häm qorbannar cirlägän il, bez üz ğömerlärebezne üterüçelär xaqına birüdän baş tartabız" di Quşma Ştatlar prezidentı Avstraliä parlamentı qarşında yasağan çığışında. Terrorğa qarşı köräş mäs''äläse George Bushnıñ Aziä säfäre barışında härzaman üzäktä tordı, ul monı üzeneñ Yaponiädä, Filipinda, Thailandta, Singapur wä İndoneziädä ütkän söyläşülärendä kütärde. Aziä häm Tın okean töbägendä xezmättäşlek oyışmasınıñ Bangkokta ütkän cıyınında prezident Bush anda qatnaşqan däwlät wä xökümät başlıqlarınnan terror belän köräşkä kübräk iğtibar birü yöklämäsen aluğa ireşte. Läkin amerikan citäkçesenä säfäre barışında tänqit süzläre işetergä dä turı kilde. Atnakiç Bush Avstraliä başqalası Canberrada üz çığışın yasağanda meñlägän keşe parlament binası qarşında Quşma Ştatlarnıñ tışqı säyäsätenä qarşı cıyın ütkärde. Bushnı tänqitläw xätta ul çığış yasağan utırışlar zalında da işetelde. Başta cämäğätçelek öçen ayırılğan küzätü urınınnan ber üsmer bala, äl-Qaidä äğzası buluda şiklänelep amerikannar tarafınnan Guantanamoda totılğan keşeneñ malayı, "äy Bush, minem ätiem qayda?" dip qıçqırdı. Anı utırışlar zalınnan çığarğannan soñ Avstraliäneñ yäşellär partiäsennän ike senator, Ğiraq suğışına qarşı çıqqan Bob Brown häm Kerry Nettle Bush notığın ike märtäbä özärgä tırıştılar.

Audio, utırışnı alıp baru

Amerikan prezidentı şuşı qarşılıq omtılışlarına barı tik, "min süz ireklegen yaratam" dip kenä äytä aldı. Ğädättä ul üzen tulısınça yaqlağan häm härdaim xuplap torğan cämäğät aldında ğına çığış yasıy, bu yulı isä aña beraz kierenkeräk wäzğiattä qalırğa turı kilde. Bush çığışın özüwe öçen utırışlar zalınnan çığarılğan senator Brown uramdağı xalıqqa bolay dip belderde.

Audio, Bob Brown

"Ğiraq wä qorallar öçen 86 milliard dollar äräm itkänçe, şul aqçanı çista su eçü, tuq bulu häm mäktäplärgä baru öçen dönya balalarına biregez, häm şunnan soñ sez dönyanıñ xörmäten qazanırsız, Bush äfände!" di Avstraliä senatorı Bob Brown. Amerikan prezidentı säfärenä qarşı uram cıyınnarı şulay uq Filipinda häm İndoneziädä dä ütte.
XS
SM
MD
LG