Accessibility links

шимбә, 3 декабрь 2016, Казан вакыты 18:44

Cämilä Nizametdin: “Tatarstanğa borılıp ta qaramam”, - digän idem


Pänceşämbe könne “Intertat.ru” elektron gazetasında Cämilä Nizametdin belän matbuğat konferensiäse uzdı. Läkin çit ildä icat itüçe tatar cırçıları belän Tatarstan jurnalistları bötenläy qızıqsınmıy buğay, çönki matbuğat oçraşuına barı ber genä jurnalist kilgän ide. Anısı da rus matbuğatınnan. Monı Cämilä üze dä sizgän. “Çallıda Mälikä häm “Qazan yegetläre” törkeme belän konsert quyarğa barğaç, Mälikä belän “Qazan yegetlären” jurnalistlar çornap aldı, ä miña iğtibar itüçe dä yuq. Utıram şunda qırıyda. Konsert tämamlanğaç qına sezneñ cırlawığızda Yevropa stilenä yaqın, sez kem häm tağın şunıñ işe sorawlar yawdıra başladılar”, - di Cämilä. Äytergä kiräk, Cämilä Nizametdin tumışı belän Perm ölkäsennän. 5 yäşendä yätim qalıp, ul Udmurtiädäge äbise belän üsä. Mäktäpne tämamlağaç artistqa bulırğa xıyallanıp, Qazandağı teatr uçilişçesına uqırğa kerä. Soñraq ul Estoniädä belem ala häm şunda waqıtta üzeneñ mäxäbbäte – fin tatarı İrxan Nizametdin belän oçraşa. “Min ul çaqta qayda yäşärgä belmiçä, küp awırlıqlar kürep Tatarstannan şul xätle tuyğan idem, xätta ğömeremdä dä Tatarstanğa äylänep qaramam dip uylağan idem”.

Audio

Bügen anıñ olı ulı Timergä – 8, İrekkä –7, ä keçeläre Qamilägä – 5 yäş ikän.Cämiläneñ Tatarstannı sağınu xisläre şiğerlärenä salınğan. “Finnär alar salqın xalıq. Keşelärgä şiklänebräk qarıylar. Mine Tatarstandağı millättäşläremneñ cılılığı üzenä tarta”,- di.

Audio

Cämilä xäzer şiğerlärenä köylär yaza, anıñ cırların küp kenä tatar cırçıları, “Qazan yegetläre” häm “Zaman” törkeme yaratıp başqara. Bügenge köndä Cämilä “Zaman” studiäse belän avtorlıq diskın yazdıru belän mäşgul. Ul 11 yıl Finlyandiädä yäşäw däwerendä Tatarstandağı cırçılar icatı belän tanışıp baruın belderde, ämma min barı İlham ağa Şakirovnı ğına tıñlıy ala idem, çönki taqta suğuğa oxşaş köylär minem başıma tipkän kebek bula ide”, - di. Şulay uq ul köy yazğanda küp yañalıqnı çit il muzıkasınnan aluın äytä. Menä tanılıp kilüçe Mälikä dä çit il köylären tıñlap üskän, şuña tamaşaçı anı tiz üz itte di. Çönki bez üzebezne irken, tabiği totabız. Min arısam säxnägä utırıp ta cırlıy alam di, Cämilä.

Finlyandiädäge tormışına kilgändä, ul anda tatarlarnıñ üzara bik dus yäşäwlären äytä. Şulay uq Cämilä Finlyandiädä balalarnı keçkenädän ük dingä xörmät tärbiäläp üsterälär di. “Minem ullarım miña qarağanda kübräk sürä belä, çönki alar atna sayın islam däreslärenä yöri. Ämma şunısı üzençälekle monda äbilär Tatarstandağı kebek yualıq yapmıylar. Alar härwaqıt innek buyap, çäçne yasap yörilär”, - di Cämilä Nizametdin.

Landış Xarrasova

XS
SM
MD
LG