Accessibility links

якшәмбе, 11 декабрь 2016, Казан вакыты 14:51

Qazanğa Gennadiy Seleznev kilep kitte


Comğa, 24nçe oktäber irtäsendä, Qazanğa Rusiä Däwlät Duması räise Gennadiy Seleznev kilde. Hawa alanında anı Tatarstan kollegası Färit Möxämmätşin qarşı aldı. Qazanda Gennadiy Seleznev respublika Däwlät Şurası, Qazan şähär sovetı deputatları belän oçraşıp söyläşte, Layış rayonındağı Mixail Derjavin muzeyında bulda, andağı xalıq belän oçraştı. Xäyer, spiker anıñ öçen dip äzerlängän bay programmanıñ küp kenä çaraların kürä almadı. Çönki anıñ vizitı bik qısqa waqıtlı buldı, Seleznev comğa kiçen inde kire Mäskäwgä oçtı. Nişliseñ bit inde, saylaw aldı waqıtı äkrenläp kenä ütä bara, ä deputat bulıp saylanırğa teläwçe nämzätlärneñ, törle firkä wäkilläreneñ Rusiä buylap yörise şaqtıy. Menä Tatarstannan yaña Dumağa saylanırğa niät itüçe xäzerge Rusiä Duması deputatı Oleg Morozov ta 23nçe oktäber könne Alabuğada xalıq belän oçraştı. İntertat.ru agentlığı xäbär itüençä, Oleg Morozov anda xäzerge saylawçılar belän genä tügel, ä kiläçäk saylawçılar, yäş buın wäkilläre, uquçılar belän dä küreşte. Şuşı könnärdä genä saylaw aldı yalına kitkän Tatarstan prezidentı Mintimer Şäymiev tä tik utırmıy. Üzeneñ İnterfax agentlığına birgän äñgämäsendä ul deputatlıqqa nämzätlärneñ saylaw aldı debatları turıdan-turı efirda ütärgä tieş, dip belderde. Şulay uq Mintimer Şäymiev, massaküläm mäğlümat çaraları da, nämzätlär dä süz iregen saqlaw häm xalıqnıñ döres, tulı mäğlümatkä xoquqın küzdä totıp, säyäsi kul’turağa öyränergä tieş, älege xoquqlar berniçek tä qısılırğa tieş tügel, dide.

23nçe oktäber könne Qazan däwlät pedagogiä universitetı üzeneñ 127 yıllıq yubileyın bäyräm itte. Şuşı uñaydan ütkärelgän aktlar köne qısalarında universitetta tantanalı cıyılış, büläkläwlär, täbrikläwlär, konsert uzdı. Comğa könne Qazanda tağın ber qızıqlı çara ütte. Qazan milli-mädäni üzägendä Sverdlaw ölkäsennän kilgän millättäşlärebez – Urta Ural tawışları ansamble konsert kürsätte. Älege çara Ekaterinburgta dönya kürgän Bez – tatarlar audiocıyıntığın täqdir itügä bağışlandı. Konsertta tanılğan cırçı Xäydär Ğilfanov, Rezeda häm Fail Yarullinnar, yäş cırçı Albinä Waxitova häm başqalar qatnaştı. 24nçe oktäber könne Qazan milli-mädäni üzägenä kilüçelär Ekaterinburgtağı millättäşlärebezneñ icatı belän tanışıp qına qalmadı, ä alar icat itkän audioal’bomnı da satıp ala aldı.

XS
SM
MD
LG