Accessibility links

шимбә, 10 декабрь 2016, Казан вакыты 10:08

Ramazan ayı Bagdadta berniçä köçle şartlaw belän başlandı


Möselman dönyası Ramazan ayına kerde, xörmätle tıñlawçılar. Läkin bu Ğiraqtağı wäzğiatkä berniçek tä tä''sir itmäde diärgä bula, düşämbe könne dä Ğiraq başqalası Bagdadnı berniçä şartlaw teträtte. Yäkşämbedä isä amerikan saqlanu ministrınıñ urınbasarı urnaşqan qunaqxanägä höcüm yasalğan ide. Şuşı kierenkelek sürätendä Quşma Ştatlarnıñ däwlät sekretare Colin Powell suğış başlağanda üz ileneñ Ğiraqta bu xätle köçle qarşılıq kürsätüne kötmägänen äytte.

Audio, Bagdad uramında

Ğiraq başqalası öçen xäzer ğädäti bulğan awazlar - aşığıç yardäm maşinaları çirattağı şartlaw urınına aşığa. Bu yulı Xalıqara Qızıl Xaç/Qızıl Yarımay cämğiateneñ Bagdadtağı idaräse yanına, düşämbe irtän anda bomba quyılğan ber maşina şartlatıldı. Ğiraqtağı amerikan xärbiläre wäkile, general Mark Hertling xäbärçelärgä, bu intihar höcüme ide dip belderde.

Audio, Mark Hertling

"Sartlatqıçlar quyılğan maşina Qızıl Xaç/Qızıl Yarımay binası yanına yaqınlaşırğa tırıştı, anı Ğiraqnıñ saqlaw xezmäte häm Ğiraq politsiäse tuqtatqaç, intihar höcümçe üzeneñ binağa yaqınraq kilä almawın añlap bombanı annan çittäräk şartlatırğa buldı kebek" di Bagdadtağı amerikan generalı Hertling. Anıñ süzlärenä qarağanda, älege höcüm näticäsendä kimendä 10 ğiraqlı hälak bulğan, yaqınça 10-ı yaralanğan. General şulay uq, höcümçe üz maşinasına Qızıl Xaç bilgelären quyğan bulğanğa oşıy dip tä belderde. Şartlaw urınında bulğan şahidlär, şuşı xalıqara oyışma binasına zur zian kilüwe, anıñ alğı diwarınıñ işelep töşüwe turında xäbär itä. Anda eşläwçe humanitar xezmätkärlär üzläre zur tetränü kiçerä, oyışmanıñ matbuğat wäkile Nada Doumani, "bez üzebezneñ, alıp barılğan humanitar eşebez belän yaqlanuwıbızğa işanıp yäşi idek, bez biredä 1980-nçe yıldan birle eşläwebez bezneñ säyäsättän çittä totuwıbıznı yaxşı kürsätä dip uylıy idek. Ägär dä bu höcüm bezneñ eşçänlekkä tä''sir itsä, moñardan berençe çiratta ğiraqlılar cäfa çigäçäk" dip belderde. Läkin Xalıqara Qızıl Xaçnıñ Jenevadağı baş idaräse, soñğı höcümgä qaramastan oyışmanıñ Ğiraqtan kitärgä cıyınmawın äytä. Antonella Notari, Xalıqara Qızıl Xaç/Qızıl Yarımaynıñ Jenevadağı wäkile.

Audio, Antonella Notari

"Bez Ğiraqta qalaçaqbız, beläbez ki, biredä Qızıl Xaç/Qızıl Yarımayğa ixtiac bar. Bez Ğiraqta 1980-nçe yıldan birle eşlibez häm iñ awır şartlarda da bez monnan kitmädek, Ğiraq xalqına bezneñ biredä buluwıbız kiräk, monı bez yaxşı beläbez" di Antonella Notari. Düşämbedä şartlawlar şuşı xalıqara oyışma binası yanında ğına bulmadı, alar tağın dürt cirdä yañğıradı. Yäkşämbedä isä höcüm, Quşma Ştatlarnıñ saqlanu ministrı urınbasarı Paul Wolfowitz urnaşqan qunaqxanägä yasalğan ide. Saddamğa qarşı suğış başlawnı iñ därräw yaqlawçılarnıñ berse bulğan şuşı türägä zian kilmäde, läkin höcüm näticäsendä ber amerikan ğäskärie hälak buldı. Şuşı waqiğälär sürätendä Quşma Ştatlarnıñ däwlät sekretare Colin Powell yäkşämbe kiçen, Waşingtonnıñ suğışnı başlağanda Ğiraqta qarşılıqnıñ şulay ozaq baruwın bötenläy farazlamawın tanıdı.

Audio, Colin Powell

"Bez monıñ, yäğni Ğiraqtağı qarşılıqnıñ şulay ozaqqa suzıluwın hiç kötmägän idek" di Quşma Ştatlarnıñ däwlät sekretare Powell.

Kärim Kamal, Praga
XS
SM
MD
LG