Accessibility links

пәнҗешәмбе, 8 декабрь 2016, Казан вакыты 01:20

Dönya illäre citäkçeläre häm xalıqara oyışmalar Bağdadtağı şartlawlarğa açulı reaksiä belderde


AQŞ prezidentı George Bush Ğiraqta höcümnär yışayuğa qaramastan Quşma Ştatlar anda üz yulında qalaçaq dide:

AUDİO: Ğiraqta bezneñ tärräqiätne tuqtatu öçen härkemne üterergä teläwçe terrorçılar bar. Bez anda ni qädär kübräk uñışqa ireşsäk, ul üterüçelär şul qädär kübräk reaksiä kürsätä häm bezneñ burıç alarnı tabıp xökemgä tartu.

Brüssel'dä Yewropa Berlegeneñ tışqı säyäsät öçen cawaplı yuğarı wäkile Javier Solana jurnalistlarğa Ğiraqta wäzğiät bik şäp tügel, ämma ul quldan ıçqınğan dip tä isäplämim dide. Britaniä tışqı eşlär ministrı Jack Straw mondıy ğämällär bezne qurqıta almıy dide. Straw Ğiraqta iminlek qänäğätlänerlek bulmasa da, ğömümi wäzğiät yaxşıra bara dip äytte:

AUDİO: Min Bağdadta äle genä bulğan terror ğämälenä tetränü häm näfrät belderergä telim. Terrorçılarnıñ tağın da ber märtäbä AQŞ yäki Britaniä xärbilärenä tügel, ä barı tik humanitar eşlär belän genä şöğellänüçe xalıqara oyışmağa höcüm itüe alarnıñ ni däräcädä tübänlekkä töşüen kürtäsä.

Xalıqara Qızıl Xaç Komitetı wäkile Antonella Notari bügenge höcüm Qızıl Xaçnıñ Ğiraqtağı eşçänlegen tuqtatmayaçaq dip belderde:

AUDİO: Bez Ğiraqta qalırğa cıyınabız. Bez Ğiraqta Qızıl Xaçqa ixtiac buluın beläbez. Bez Ğiraqta 1980-nçe yıldan birle eşlibez häm nindi genä yaman şartlar bulmasın bez annan berqayçan da kitmädek. Bez üzebezneñ Ğiraq xalqına kiräkle buluıbıznı beläbez.

Qızıl Xaç aldağı könnärdä Bağdadtağı eş şartların küzdän kiçeräçägen belderde.

XS
SM
MD
LG