22nçe oktäber könne kitapxanäçelärneñ seminarı Çistay rayonında däwam itte. Alar anda üzläreneñ eş täcribäse belän urtaqlaştılar, Yawşirmä awılındağı Ğayaz İsxaqi muzey-utarı belän tanıştılar häm Çistay rayon mädäniät bülegeneñ “Encelär” icadi tügäräge artistları çığışın qaradılar. İrtän irtük seminarğa cıyılğan kitapxanäçelär Çistay yağına yul tottılar. Kön yañğırlı bulsa da, cılı maşinada bergä-bergä 3 säğät buyı söyläşep barıp, Çistayğa barıp citkänne sizmi dä qaldılar. Monda kitapxanäçelärne Çistay şähäreneñ üzäkläşterelgän kitapxanäse direktorı Gölyözem Baybikova häm kitapxanäneñ xezmätkärläre xuş küñel häm tämle çäy belän qarşı aldılar. Ä TR Milli kitapxanäseneñ direktor urınbasarı İrek Hadiev kitapxanä isemennän Çistay üzäkläşterelgän kitapxanäsenä yaña basmalar büläk itte. Seminarğa kilgän qunaqlarnı Çistay rayonı mädäniät idäräse başlığı Rezeda Grigoryeva täbrikläde. Kitapxanäneñ direktorı Gölyözem Baybikova kitapxanäçelär aldında Çistay şähäre häm kitapxanäse turında söyläde.
Şunnan soñ seminarğa cıyılğan kitapxanäçelär aldında torğan problemaları turında söyläştelär. Tatarstanda kitaplarnıñ küp buluı şatlandırsa da, Rusiä töbäklärendä yäşäwçe tatarlarnı kitap kiştälärendäge basmalarnıñ iske häm bik az buluı borçuğa sala. Söyläşü waqıtında kitapnı uquçı yäşlär bügenge köndä urtaça 50% bulsa da, mäktäplärdä tatar tele häm ädäbiäten uqıtmaw, aldağı köndä kitap uquçılarnıñ sanın kimetergä mömkin digän fiker dä yañğıradı.Kitap - belem çişmäse dip yuqqa ğına äytmägännär şul. Menä bit Ğayaz İsxaqinıñ kitapları xalıqqa 100 yılğa yaqın waqıt ütkäç kenä qaytsa da, bügenge köndä alar äle haman aktual'. Millätneñ üzañın tärbiäläwdä, millätne saqlap qaluda mädäniät çaraları bik zur rol' uynıy. Ä kitap - bu çaralarnıñ iñ zur öleşen alıp tora. Şuña kürä dä Rusiä töbäklärendä yäşägän tatarlarğa xezmät kürsätüçe kitapxanäçelärgä zur iğtibar birelde.
Çistaydan urap qaytqan kitapxanäçelär Qazan şähärendä K.Tinçurin teatrı artistları uynawında İldar Yuzeyevnıñ “Sanduğaçlar kilgän bezgä” spektaklen qaradı.Mälikä Basır
