Accessibility links

Кайнар хәбәр

Alman, ingliz qunaqları İjaw şähäreneñ tatar klassik gimnaziäsendä häm 116 balalar baqçasında bulıp kittelär.


Udmurt däwlät universitetınıñ ikençe tel öyrätü kafedrası İjaw şähärendäge milli tellär uqıtqan mäktäplär belän dä elemtälär buldırdı. Yuğarı uqıtu yortlarınnan möğallimälär mäktäplärdä bergäläp däreslär alıp bara, şundıy däreslärneñ bersendä — tatar klassik gimnaziäsendä tatar, rus, ingliz telendä berläşterep äzerlängän däres turında «Azatlıq» radiosı tıñlawçılarına xäbär itkän idek. Universitettan kafedra mödire Lyudmila Malıx äytüençä, tatar klassik gimnaziäsen alar oçraqlı saylamağannar, monda tellärne öyränü yağınnan iskitkeç sälätle balalar uqi.

Elege kafedradan ğalimnär çit il uqu yortları belän dä elemtä urnaştırğan. Ütkän atnada çit illärdän alman, ingliz qunaqları tatar klassik gimnaziäsendä häm tatar törkeme bulğan 116 balalar baqçasında bulıp kittelär.

Germaniäneñ Lyuniburg universitetınnan kilgän qunaq Ğarri Uolşnı gimnazistlar milli kiemnärdän qarşı aldı, häm ber dä tartınıp tormıyça anıñ belän inlizçä aralaşa da başladılar. Ğarri Uolş üze eşlägän universitetta çit tellär bülegen citäkli. Udmurt däwlär universitetınıñ ikençe tellär kafedrası belän bäyläneş totu säbäple, anıñ İjawğa öçençe kilüe ikän. Gimnaziädä dürt — rus, tatar, ingliz, ğäräp telläre uqıtıluın belgäç, Ğarri Uolş «minem täcribämdä mondıy oçraq äle berençe tapqır»,— dip, ğäcäplänüen belderde.

Qunaqnı zalda «Çulpan» ansamble sälämläde. Häm milli sıyıbız bulğan çäk-çäk belän sıyladı. Gimnazistlarğa ul London turında videokasseta alıp kilgän, anı qarağaç, üze dä östäp şähärneñ istälekle urınnarı, anda yäşäwçe millätlär turında söyläde. Qunaq qızıq häm canlı itep söyläwe belän uquçılarnıñ iğtibarın tämam yawladı. Ğomumän, söyläşü ike yaqlı bardı, balalar sorawlar da küp birde, üzläre dä qunaqnı qızıqsındırğan sorawlarğa tulı cawap birergä tırıştı.

Oçraşudan soñ, balalar nindiräk fikerdä soñ?

Audio

Ğarri Uolş bezdä xalıqnıñ qunaqçıl buluın bilgeläp ütte. Pärämäç, pil'män kebek milli azıqlarnı yaratıp ölgerüen äytte. «Tämle» dide ul milli çäk-çäkne qabıp qarağaç. Gimnazistlar aña milli baş kiemebez käläpüş büläk ittelär. Uquçılar belän oçraşudan soñ, ul komp'yuter klassında, kitapxanädä buldı. Gimnaziä belän tanışıp, balalar belän aralaşudan soñ ul monda bik çista, tınıç buluın bilgeläp ütte. Ägär bala bulsam, miña monda bik tä oşar ide, uquçılar da açıq, aralaşuçan, bezne monda kötep aluları da işektän kergäç tä sizelde, milli küçtänäçlär belän sıylawın, üze öçen kötelmägän quanıç buldı, dide.

İkençe ber törkem qunaqlar tatar gruppaları bulğan İjaw şähäreneñ 116nçı sanlı balalar baqçasında nänilär belän tanıştı. Baqçada almannarğa nänilär «Teremkäy» äkiäten kürsätte. Qunaqlar durt yäşlek balalarnıñ äkiätne matur itep uynawlarına ğäcäplände, kiemnäre belän soqlandı. Balalar qunaqlarnı üz baqçalarındağı, respublikada küpçelekne täşkil itkän, — tatar, rus, udmurt xalıqlarınıñ könküreşen çağıldırğan muzey bülmäsenä dä alıp kerde, üzläre andağı eksponatlar belän tanıştırdı. Bolarnı da almannar soqlanıp küzätte. Häm jurnalistlarnıñ sorawlarına cawap birgändä tübändäge fikerlärne belderde. «Baqçada tärle millät balaları dustanä mönäsäbättä, bu bik yaxşı küreneş, Germaniäneñ Gamburg şähärendä dä möselmannar şundıy eşne başlarğa cıyına, ä tatarlarğa kilgändä, min elek bu xalıqnı Tatarstanda ğına yäşilär dip belä idem dip assızıqladı, häm biredä tatarlarnı kürep, ğäcäplänü xisen belderde.

Xämidä Ğayfullina, Udmurtiä.
XS
SM
MD
LG