Accessibility links

Xikmätle şar keşelärne däwalıy


Başqortstannıñ Blagovar rayonı üzäge Yazıkovoda yäşäwçe Radik Bogdanov şundıy şar uylap tapqan. Bu şar käräz sıman yassılıqtan tora häm şul şar eçendä nindider energiä xasil bula. Bu energiä tä'sirendä sudağı stronsiy, kobal't häm başqa şundıy zıyanlı matdälär yuqqa çığa. Ğomumän, sunıñ sostavı üzgärä. Bu şardan energiä, yaqtılıq sibelä ikän häm üzgärtelgän sunı eçkän awırular terelä başlıy. Mondıy moğcizağa ışanmas ideñ, Mäskäwdä şuşı yılnıñ 7nçe avgustında ütkärelgän sınawlar näticäse sertifikatı alınğan. Anda şarğa quyılğan sudağı üzgäreşlär terkälä. Beläbez, beläbez, elekke yıllarda televizor ekranı aldına quyıp sunı zaryajat' itüçelärne dä xäterlibez. Ämma, Radik Bogdanov üzeneñ açışı öçen bernärsä dä soramıy. Barı tik qızıqsınıp öyränüne genä ütenä. Ufada çığuçı Voskresnaya gazetada bilgele jurnalist Svetlana Ğafurovanıñ ike mäqäläse älege moğciza turında täfsilläp yaza. Svetlana bu moğcizağa häm açışqa ışana.

Ni öçen kilgän soñ Radik Bogdanov Azatlıq byurosına? Ul şuşı käräz sıman yassılıqtan yasalğan şarnı xrustal'dän häm zurraq itep Qazanda yasarğa kiräk, dip sanıy. Anıñ niäte – Qazannıñ meñyıllığı bäyrämenä energiä tuplıy torğan şar büläk itü. Anıñ da, başqalarnıñ da izge niätläre tormışqa aşsın. Älege genä söylängän xikmätle xäl nigezdä uñay häm optimistik ruxta. Keşe ezlänä, moğciza kötä, ul kilmäsä, üze moğciza yasarğa teli. Käräz sıman şar eçendäge su çınnan da faydalı bulsa da, bulmasa da, annan zıyan yuq bit. Ä bälki, ğädäti töşençälärne, qağidälärne inqär itüçe açışlar fänne dä bayıtırğa, tormışnı da üzgärtergä sälätleder.

XS
SM
MD
LG