Accessibility links

дүшәмбе, 5 декабрь 2016, Казан вакыты 07:36

Ğiraqta amerikannarğa qarşı kem köräşä - Saddam tarafdarlarımı ällä inde çit ildän kilgän terrorçılarmı?


Bagdadtağı soñğı höcümnär iğtibar üzägenä alar artında nindi köçlär tora digän soñ sorawnı quydı, xörmätle tıñlawçılar. Ğiraqtağı amerikan ğäskärläreneñ bu mäs''älädäge fikere ike törle. Berençeläre şartlawlar öçen Saddamnıñ Baath partiäse äğzaları cawaplı dip isäpläsä, ikençeläre çit ilgän terrorçılarnı ğäyepli.

Ğiraqta amerikannarğa qarşı köräşne kem alıp bara soñ digän sorawğa cawap xäzer genä ezlänä başlamadı. İnde elek tä qayber xärbilär, höcümnärne Saddam Xösäenneñ Baath partiäse qaldıqları ğına oyıştıra ala, çönki ilgä çit il suğışçıları kerüwe terkälmäde dip belderep kilgän ide. Yäkşämbe könne monı general Martin Dempsey yänä ber äytte, ä düşämbedä ikençe ber amerikan xärbie, general Raymond Obierno Pentagondağı xäbärçelär belän ütkärelgän videokiñäşmädä şul fikerne qabatlap bolay dide.

Audio, Raymond Obierno

"Bez älegä qädär ilgä çit il suğışçılarınıñ küpläp kilüwen kürgänebez bulmadı" di amerikan generalı. Läkin xärbilär üzläre dä bu mäs''älädä ber fikerdä tügel sıman. General Dempseynıñ urınbasarı Mark Hertling, misal öçen, Bagdadtağı soñğı şartlawlarnı näq menä çittän kilgän köçlärneñ eşe dip bäyäli. Ämma ul berük waqıtta, bu elek belderelgän qaraşqa, yäğni höcümnär artında Baath äğzaları tora digän fikergä qarşı kilmi, düşämbegä qädär elekke höcümnärneñ Ğiraqtağı çit il suğışçıları tarafınnan eşlänüwen kürsätkän dälillär yuq ide, ä xäzer isä alar bar dip belderde. General Hertling kitergän mäğlümatqa qarağanda, atna başında Bagdadta, intihar höcüm äzerläwdä şiklänelgän ber adäm totqarlanğan häm añarda Süriä passportı tabılğan. Şuñadır da xäzer inde Quşma Ştatlar prezidentı George Bush ta, Baath partiäse qaldıqları Ğiraqta çittän kilgän terrorçılar belän bergä eş itä digän fiker belderä. Sişämbedä Aq yortta uzğan matbuğat oçraşuwında ul...

Audio, George Bush

"Bez xäzerge waqıtta andağı şul keşelärneñ kem ikänlegen açıqlarğa tırışabız, ämma min sezgä şunı äytä alam, minemçä alar Baathtan da, çittän kilgän terrorçılar da, yäisä xätta ikese beryulı da bula ala" di amerikan prezidentı. Belgeçlärgä kilgändä, alar Ğiraqta çittän kilgän suğışçılarnıñ eş itüwe ber dä ğäcäyep tügel digän fikerdä tora. Waşingtonda urnaşqan Saqlanu mäğlümatı üzäge xezmätkäre Mark Burgess, Ğiraqta alarnıñ küpme ikänlegen açıqlaw qıyın bulsa da, il çikläreneñ xäzer şaqtıy açıq buluwın iskä alğanda, andıy suğışçılarnıñ Ğiraqqa kilüwe şik uyatmıy dip isäpli.

Audio, Mark Burgess

"Eşlärneñ niçek baruwın kürep torğanda, min qayber çit il suğışçılarınıñ Ğiraqqa kilä almawına bik ğäcäpläner idem, alar andıy mömkinlekne ıçqındırmas ide, minemçä, andıy şartlarda Ğiraqqa barmaw alar öçen bik ğäcäep ber närsä bulır ide" di Waşingtondağı Saqlanu mäğlümatı üzägendä eşläwçe Mark Burgess. İkençe ber belgeç, Waşingtondağı Amerikan universitetında tarix uqıtqan professor Anna Nelson isä bolayraq uylıy.

Audio, Anna Nelson

Nelson fikerençä, amerikan xärbiläreneñ Bagdadtağı höcümnärne kem oyıştıru turında törle häm qarşılıqlı farazalar äytüwe alarnıñ bu ölkädä bernindi dä anıq mäğlümatı bulmawın ğına kürsätä.

Kärim Kamal, Praga
XS
SM
MD
LG