Accessibility links

чәршәмбе, 7 декабрь 2016, Казан вакыты 21:33

Qazanğa Rim Papası wäkile, arxiepiskop Antonio Mennini kilde


Qazanğa Rim Papası wäkile – arxiepiskop Antonio Mennini kilde. 31nçe oktäber könne ul şähär xakimiäte başlığı Kamil İsxaqov belän oçraşıp söyläşte, Qazan belän tanıştı. Comğa könne, köndezge säğät 2dä Antonio Mennini Qazandağı katoliklar öçen tözeläçäk çirkäw urının izgeläşterüdä qatnaştı. Äytergä kiräk, respublikada katoliklar küp tügel. Törle mäğlümätlärgä qarağanda, alarnıñ sanı 200dän alıp 300 keşegä qädär. Şuña da qaramastan, tizdän Qazannıñ üzägendä katoliklar üzäge bulaçaq. alarnıñ Şulay itep, Vatikan belän Qazan arasındağı duslıq nığıy bara. Tatarstannıñ iqtisat häm sänäğät ministrlığı belän Qazan däwlät universitetınıñ da araları bik dustanä. Bu xaqta Aleksey Paxomov häm Mäğsüm Sälaxov qul quyğan ikeyaqlı xezmättäşlek turındağı kileşü kürsätep tora. Bu xaqtağı xäbärdä universitet belän ministrlıq arasında nindi xezmättäşlek turında süz barğanı äytelmi. Xäyer, kileşü bulğanda, urtaq eşlärne tabıp bula inde ul. Respublikanıñ Mäğärif ministrlığı da soñğı arada bik qatı eşli. İnde xäbär itkänebezçä, 30nçı oktäber könne genä Qazanda älege ministrlıq tarafınnan berniçä möhim çara oyıştırılğan ide. Comğa könne dä alar tik utırmadılar. Başqalanıñ 149 tatar mäktäbendä Milli mäğärif belän idärä itüne kamilläşterü dip atalğan seminar uzdı. Anda mäğärif idäräläre citäkçeläreneñ milli mäğärif buyınça urınbasarların idäräne kamilläşterergä öyrättelär. Ä 1nçe noyäberdän başlap härkem respublikanıñ Mäğärif ministrlığına üzeneñ täqdimnären citkerep, sorawların birä alaçaq. Monıñ 92 21 22 telefonına ğına şaltıratırğa kiräk. Här şimbä könne säğät 9dan alıp 12gä qädär şuşı qaynar liniädä ministrnıñ urınbasarları, bülek citäkçeläre xalıq belän aralaşaçaq. 30nçı oktäber könne Tatarstannıñ tel, ädäbiät häm sänğät institutınıñ Ğilmi Şurası utırışı uzdı. Läkin bu yulı ul ğädäti fänni cıyılış räweşendä genä ütmäde. Çönki älege utırış kürenekle ğalim, filologiä fännäre doktorı, professor Mirfatıx Zäkievneñ 75 yıllıq yubileyına bağışlandı. Anda ğalimneñ eşçänlege turında söyläştelär, qotlaw häm räxmät süzlären ireşterdelär. Tatar ictimaği üzäge dä üzeneñ idärä utırışın ütkärde. Anda ağımdağı eşlär qaraldı häm şulay uq idärädän Näbiulla Nuriev, Rinat Yosıpov, Färit Xäbibullinnarnı çığaru turında kileşende.

Gölnaz İlgizär

XS
SM
MD
LG