Accessibility links

якшәмбе, 11 декабрь 2016, Казан вакыты 05:12

Mixail Kasyanov häm Anatoli Çubays YUKOS tiräsendäge xällär uñayınnan nıq borçıluwın belderä


Mäskäw. Rusiä premyer-ministrı Mixail Kasyanov, baş prokuraturanıñ YUKOS şirkäte aksiälären tuñdırıp toru turında qarar çığaruwı uñayınnan üzeneñ nıq borçıluwın belderde. Anıñ süzlärenä qarağanda, monıñ näticälären abaylaw bik qıyın bulaçaq, çönki bu yoğıntı yasawnıñ yaña ber töre bulıp tora. Rusiä prokuraturası YUKOS aksiälären tuñdırıp toru qararın kiçä kiç bäyän itkän ide, aña qädär şuşı şirkätneñ başlığı, mäğlüm eşmäkär Mixail Xodorkovski qulğa alındı. Bügen Rusiä prezidentı Vladimir Putin üzeneñ eçke idaräse başlığı Aleksander Voloşinneñ eşennän kitü üteneçen qänäğätländerde. Prezident idaräse citäkçese itep Voloşinneñ urınbasarı Dmitri Medvedev bilgelände. Rusiäneñ kürenekle uñçı säyäsätçese Anatoli Çubays soñğı täräqqiatne bäyäläp, yuğarı citäkçelektä säyäsät yünäleşen üzgärtü bara dip belderde. Kiçä iminlek xezmäte keşeläre "Novosibirskenergo" şirkäte idaräsendä dä tentü ütkärgän ide. Älege şirkät Çubays citäklägän "Berläşterelgän Energiä Çeltäre"neñ ber öleşe bulıp tora. Xäbärlär çığarılışı äzerlängändä İTAR-TASS häm İnterFax agentlıqları, Rusiä prokuraturası YUKOSnıñ tuñdırılğan aksiälären öleşçä azat itte, çönki xucalarınıñ cinayät eşenä qatnaşı bulmawı açıqlandı dip belderde. Süz YUKOSnıñ 4.5 protsent aksiäläre turında bara.

XS
SM
MD
LG