Accessibility links

якшәмбе, 4 декабрь 2016, Казан вакыты 13:17

Amerikan prezidentı George Bush Yevropa Berlegennän Äfğanstannı tözekländerügä aqça soradı


Amerikan prezidentı George Bush, bügen İtalyan premyer-ministrı Silvio Berlusconi'ğa şaltratıp Yevropa Berlegennän Äfğanstannı tözekländerügä finans yardäm sorağan, dip xäbär itelä. Mäğlüm bulğança İtaliä xäzerge waqıtta Yevropa Berlegeneñ räise wazifasın üti.

Ğiraqnı da ayaqqa bastıru kiräklege säbäple soñğı waqıtta dönya cämäğätçelege iğtibarı Äfğanstannan kitte. Uzğan atnada 60qa yaqın il wäkilläre Ğiraqnı tözekländerügä 33 milliard dollar tiräse aqça cıyarğa wäğdä itkän ide.

2002nçe yılda Äfğanstanğa 5 yıl eçendä 4 yarım milliard dollar aqça bülengän ide. Berläşkän Millätlär Oyışması İminlek Şurasınıñ yuğarı däräcädäge wäkilläre bu könnärdä Äfğanstanğa barıp, ilneñ kiläse yılda uzaçaq saylawlarğa äzerlänüen tikşeräçäk.

Äfğanstannıñ üzendä isä könyaq häm tönyaqtağı köndäş qabilärlär arasında bulğan bäreleşlärdä kimendä 30 keşe hälak bulğan.

Bügen bäreleşlär könyaqtağı Helmad Provinsiäsendä Prezident Hamid Qarzai'nıñ xökümät köçläre belän cirle qır komandirı, provinsiä başlığı urınbasarı Haji İdrees tarafdarları arasında bulğan. Politsiä İdrees utırğan maşinanı tuqtatqaç – gubernator yardämçese tikşerüdän baş tartqan, atışlar şunnan başlanıp kitkän. Haji İdrees häm anıñ yardämçese hälak bulğan, dip xäbär itelä.

İlneñ tönyağında köndäş qır komandirları Atta Möhammäd häm Abdul Räşid Dostum köçläre arasında da qarşı toru däwam itä, bügen bäreleşlärdä kimendä 5 keşe hälak bulğan.

XS
SM
MD
LG