Accessibility links

җомга, 9 декабрь 2016, Казан вакыты 11:01

Gruziädäge saylawlar näticäse: Eduard Şevardnadze oppozitsiä belän eşli alırmı?


Yäkşämbedä Gruziädä ütkän parlament saylawlarınıñ berençel näticäläre, tawışlarnıñ küpçelegen bu yulı prezident Şevardnadzegä qarşı çıqqan oppozitsiä yawlawın kürsätä. Läkin partiälär arasında aldınğılıqnı näq menä Şevardnadze citäklägän "Yaña Gruziä öçen" berläşmäse tota. Oppozitsiä köçläre, ul moña tawış birüdä xärämläşü xisabına ireşte dip belderä.

Gruziäneñ Üzäk saylaw komissiäse bäyän itkän mäğlümatqa qarağanda, Eduard Şevardnadze citäklägän häm "Yaña Gruziä öçen" dip atalğan berläşmä älegä sanalğan tawışlarnıñ yaqınça 23 protsentın qazanğan. Läkin şuşı, berençe qaraşqa zur uñışqa qaramastan, anıñ artınnan uq oppozitsiädä bulğan Demokratik Front milli xäräkäte kilä. Sulçı Xezmät partiäse, gruzin eşmäkärläreneñ Yaña Xoquqlar partiäse kebek ük parlamentqa ütep kerü öçen zarur 7 protsentlıq çikne uzdı dip xäbär itelä. Şuşı oyışmalar barısı da prezident Şevardnadze xakimiatenä kisken qarşı çığa häm alar monı üzläreneñ parlament eşçänlegendä dä däwam itär dip kötelä. Anda tağın ber köç - Acar respubliklası citäkçese Aslan Abaşidzeneñ Demokratik Yañarış berlege dä bulaçaq. Abaşidze säyäsi yaqtan qarağanda prezident Şevardnadzegä oppozitsiädä bulsa da, Gruziädä avtonom töbäk sanalğan Acarstannıñ xucalıq eşläre häm köndälek mäşäqätlär anı Tbilisidäge xakimiat belän xezmättäşlek itügä etärep kilde. Şuşı saylaw näticäläre prezident Şevardnadze öçen bigräk tä möhim. 2005-nçe yılda anıñ däwlät başlığı wazifaların ütäw mötdäte tula häm ul, üzeneñ tarafdarları belän, Gruziä xakimiatendä qalu, yäğni üze citäklägän törkemneñ kiläçäktä tä idarä dilbegäsen üz qulında totuwına ireşü xästären kürergä tieş. Älegä ul parlamentqa saylanğan härber säyäsi köç belän xezmättäşlek itärgä äzer buluwın belderä. Düşämbedä Tbilisidä uzğan matbuğat oçraşuwında ul bolay dide.

Audio, Eduard Şevardnadze

"Min bügen inde berençe belderüwemne yasadım häm üzemneñ parlamentta wäkillege bulğan teläsä nindi köç belän xezmättäşlek itärgä äzer toruwımnı äyttem. Oppozitsiäme ul, ällä başqalarımı, alar barısı da parlament eşendä borılışqa ireşü telägendä toradır dip uylıym" di Gruziä prezidentı Eduard Şevardnadze. 235 urınlı parlamentqa saylanu köräşen Gruziädä 22 partiä alıp bardı. Berençel näticälär kürsätkänçä, "Yaña Gruziä öçen" xäräkäte 23, başqala Tbilisineñ şähär şurası räise Mixail Saakaşvili citäklägän Demokratik Front milli xäräkäte 22, Xezmät partiäse 16, parlament citäkçese Nino Burjanadzeneñ demokratlar berläşmäse 10, Yaña Xoquqlar partiäse 8 yarım häm Abaşidzeneñ "Yañarış"ı 8.2 protsent tawış cıyğan. Şevardnadze tarafdarlarınıñ berençe kilüwe kötelmägän ide diärgä bula, aldan ütkärelgän fiker beleşülär uñışqa oppozitsiäneñ ireşäçägenä işarä itkän ide. Şuña da prezidentnıñ säyäsi köndäşläre anı xäzer, berençelekkä xärämläşü näticäsendä genä ireşä aluda, saylaw näticälären üzençä üzgärtüdä ğäepli. Oppozitsiä yağında torğan "Rustavi-2" kanalı, misal öçen, ilneñ qayber töbäklärendä tawış birü urınnarına yasalğan höcümnär turında xäbär itte. Üzäk saylaw komissiäse 17 saylaw urındağı tawış birü näticälären ğämäldän çığardı, läkin şuña da qaramastan, monıñ bar il külämendä saylaw näticälärenä tä''sire bulmayaçaq dip belderde. Yäkşämbe könge tawış birü bik tübän qatnaşu däräcäse belän bilgelände, saylawğa terkälgän saylawçılarnıñ barı tik yartısınnan artığı ğına kilde.

Kärim Kamal, Praga
XS
SM
MD
LG