Yäkşämbe könne Qazanğa maxsus oçqıç belän 80 keşelek çit il delegatsiäse kilde. Kaliningrad ölkäse wäkillären gubernator Vladimir Yegorov citäkli. Älege wäkillekne oçqıç mäydanında saylaw aldı yalına çıqqan Mintimer Şäymiev qarşı aldı. Älbättä, Kaliningrad ölkäse Rusiä sostavına kerä häm anıñ wäkillären çit il delegatsiäse dip şartlı räweştä genä atap bula. Ämma, Kaliningrad ölkäse Rusiäneñ iñ Könbatış öleşendä anklav, üzenä kürä utraw bulıp yäşi. İkençe bötendönya suğışına qädär Kenigsberg dip atalğan häm Germaniäneñ Prussiä cirenä kergän bu töbäk bik üzençälek iqtisadi, sotsial' şartlarda yäşi. Ber yaqtan qarasañ, ul Yevropa üzägenä yaqın häm ğasırlar buyı germannar tä'sire astında eş yörtergä künekkän yaq. İkençe yaqtan, Rusiäneñ xakimiät häm däwlät strukturasınıñ ber öleşe. Tatarstan kebek möstäqillekkä omtılğan töbäk häm üzençälekle Kaliningrad assimetrik federalizmnı täşkil itüçe töbäklär. Alarnıñ xezmättäşlege qızıqlı häm ömetle dilär. Kaliningrad citäkçelege wäkillegen düşämbe könne Qazan belän tanıştı, iqtisadi, fänni, mädäni xezmättäşlek mäs’älälären öyrände. Kaliningrad ölkäsendä 15 meñ tatar yäşi. Alarnıñ wäkilläre bu delegatsiädä dä bar. Sişämbe könne Tatar kongressınıñ Başqarma komitetında Kaliningrad tatarları belän oçraşu bulaçaq.
Rimzil Wäli
