Accessibility links

Кайнар хәбәр

Ul''yan ölkäseneñ Balalar häm yäşüsmerlär kitapxanäseTatar mädäniäte atnalığı uzdırdı


Ul'yan ölkäseneñ Balalar häm yäşüsmerlär kitapxanäseTatar mädäniäte atnalığı uzdırdı. Atna buyı “İdel buyı tatarlarınıñ ğöref-ğadätläre, könküreşe, mädäniäte” häm “Xalıq käsepläre” digän kürgäzmälär eşläde. Rässam İrek Nuretdinovnıñ icat cimeşläre belän dä tanışırğa mömkinlek buldı.

Annan tış 4 ğammäwi çara oyıştırılğan ide. Läkin alarda küp xalıq qatnaştı dip bulmıy. Ayıruça uñışlı uzğanı – cirle yazuçılar belän oçraşu.

Başta 58-mäktäptä Aleksandr Peşne citäkçelegendä eşläp kilüçe çuaş fol'klor törkeme muqşı, çuaş, tatar, urıs xalıq cırları belän qatnaşuçılarnı sälämlädelär. Annan soñ “Ömet” gäzite redaktorı İsxaq Xälimev cıyılğan xalıqnı yazuçılarıbız belän qısqaça tanıştırıp uzdı. Ğayaz İsxaqi büläge häm “Filantrop” isemle xalıqara premiä laureatı Gaqil Säğirev Ul'yan ölkäseneñ İvan Gonçarov isemendäge premiägä täqdim itelgän ide. İsxaq Xälimev äytüençä, komissiä äğzaları Ğaqılneñ “Qabatlanmas moñ” kitabı turında bik yuğarı fikerdä. Dimäk, ömetlänergä bula.

Annan soñ Tatarstan yazuçıları berlege äğzaları Lena Sadıyqova, Rifqat Xismät üz şiğerlären uqıdılar.

“Tuğan tel” idaräse äğzası Zöhrä Xäbibullina barlıq uquçıların da alıp kilgän. Liliä Yunısova, Gölinä Xäyrullina, Liliä Möxämmäteva, Älinä Çuğunova şiğri şälkem täqdim ittelär. Ğomumän, süz iñ awırtqan cirebez – telebez yazmışları turında bardı. Yazuçılar da täqdim itelgän şiğerlären şul yünäleştä saylağannar ide. Ä ğömeren yataqta uzdırırğa duçar bulğan qaharman şäxes Gaqil Säğirev Ästerxan ölkäsennän alıp qaytqan tä'sirläre belän büleşte. Bigräk anı tatar awılları mäktäplärendä dä raspisaniedä ana telenä bötenläy urın birelmäwe tirän borçuğa salğan. Häm tatar awılı mäktäbe direktorı urınına tatar keşese tabılmawı ğäcäpländergän. Revolyutsiägä qädär Ästerxannıñ, Qazan, Ural'ski, Orenbur kebek ük, tatar mädäniäte märkäzlärennän berse buluın da iskä alsañ, bigräk tä ayanıç xäl, dide Gaqil Säğirev.

Kiçä sabıy qız Gölnaz Soltanova häm Fäniä Xäliullova başqaruında Rinat Säğirevneñ abıysı Gaqil süzlärenä yazılğan cırları belän tämamlandı.

“Çaralarda xalıqnıñ az qatnaşuın tatar, çuaş, muqşınıñ üz mäktäpläre, mädäni uçaqları bulmawı belän dä añlatıp bula. Dimäk, milli üzañ yuğalıp bara. Mondıy şartlarda Sez oyıştırğan çaralar kötelgän tieşle näticä birä alırmı soñ?” – digän sorawğa kitapxanäneñ Ğammäwi-mädäni eş bülege mödire İrina Rılina bolay dide: “Mondıy ğamällär mäğlümat çaralarında yarıysı ğına yaqtırtıla. Bezneñ eşçänlek, bälki, ayırım mäktäp, kitapxanä, mädäni uçaqlar açunı üz qullarında totqan türälärgä dä uylap qararğa da etärgeç birer”.

Ayrat İbrahim, Sember.

XS
SM
MD
LG