Accessibility links

Кайнар хәбәр

Konstitutsiä köne belän Färit Möxämmätşin häm Sergey Veremeyenko qotladılar


Saylaw aldı yalına çıqqan Mintimer Şäymiev çärşämbe könne yıraq İtaliädä buldı. Ul anda räsmi vizit belän kitkän Rusiä prezidentı Vladimir Putin delegatsiäseneñ eşendä qatnaşa. Şunısı qızıqlı, qayber mäğlümatlarğa qarağanda, Vatikanda oçraşu waqıtında Rim ataqayı İoann Pavel II Vladimir Putinğa Kazanskoy Boj’ey materi ikonasın tapşıraçaq. İntertat.ru agentlığı mäğlümatlarına qarağanda, Şäymievneñ İtaliägä kitüe dä näq menä şunıñ belän bäyle. Älege ikonanıñ Qazanğa qaytarıluı turında süzlär küptännän yöri ide inde. Läkin Rus pravoslav çirkäwe häm Katoliklar arasındağı nizağlar arqasında, ikona haman da Qazanğa qaytıp citä almıy ide. Xäyer, bu eşkä Rusiä prezidentınıñ totınuı, älege wazğiätne bälki üzgärter. Ä Tatarstan xalqı çärşämbe könne bäyräm uñayınnan bilgelängän yallarğa äzerlänä. 6nçı noyäber – Tatarstan Konstitutsiäse, 7nçe noyäber – Kileşü häm tatulıq könen Tatarstanda 4 kön bäyräm itäçäklär. Respublika Konstitutsiäse qabul itelügä 11 yıl tulu bäyräme aldınnan inde täbrikläwlär dä dönya kürä başladı. Berençelärdän bulıp tatarstanlılarnı respublikanıñ prezidentı, parlamentı häm xökümäte isemennän parlament räise Färit Möxämmätşin qotladı. Ul anda Tatarstanıñ töp qanunı bügen dä säyäsättä unitaristik tendentsiälären barlıqqa kilü faktorım buldırmaw öçen ğayät möhim funksiä başqara digän. Älege bäyräm belän qotlawlar xätta kürşe respublikadan da kilep ireşte. Başqortstan respublikası prezidentına nämzät bulıp terkälgän Sergey Veremeyenko Tatarstan prezidentına xat yullağan. Anda ul Mintimer Şäymievne häm anıñ yözendä barlıq respublika xalqın Konstitutsiä köne belän täbriklägän häm Tatarstanğa kiläçäktä dä duslıq, tatulıq, anıñ cäcäk atuın telägän.

Gölnaz İlgizär

XS
SM
MD
LG