Accessibility links

җомга, 9 декабрь 2016, Казан вакыты 08:54

Sverdlov ölkäsendä Tatar häm Başqort telläre uqıtuçılarınıñ yarışması ütte


Küptän tügel Sverdlov ölkäse tarixında berençe tapqır tatar häm başqort tele uqıtuçılarınıñ konkursı bulıp ütte. Bu konkurs Sverdlov ölkäse mäğärif üsterü institutı tarafınnan uqıtuçılarnıñ belemen kütärü, pedagogik kompetentsiäsen formalaştıru maqsatı belän 5 etapta oyıştırıldı. Etaplarda tuğan tel uqıtu buyınça üz eş programmasın tözü, açıq däreslär uzdırudan alıp üz-üzeñä analiz yasaw, üz xezmäteñä bäha birä belü dä qaralğan ide.

Çınlap ta, Ärtä rayonınıñ Äceğol mäktäbe nigezendä uzdırılğan tatar tele uqıtuçıları bäygese bik zur, quanıçlı bäyrämgä äwerelde. Bäyge biredä öç kön buyı däwam itte. Konkursnıñ soñğı etabına 18 uqıtuçıdan 8е genä kilep citsä dä, här uqıtuçığa üz mömkinçeleklären kürsätü öçen böten şartlar da tudırıldı. Tatarstan Respublikası häm Sverdlov ölkäse mäğärif üsterü institutları belgeçlärennän torğan jyuri äğzaları uqıtuçılarnıñ eşen bik yuğarı bäyäläde. Alar fikerençä, Äceğol mäktäbe kollektivı da, bäygedä qatnaşırğa dip kilgän uqıtuçılar da bu waqiğağa bik yaxşılap äzerlängännär. Açıq däreslär waqıtında ber genä buş klass ta bulmadı, mäktäp balaları da biredä bik aktiv qatnaştılar. Ä inde däreslärneñ sıyfatına kilsäk, jyuri fikerençä, küplär öyränep qalırlıq iskitkeç metodqa belän eşlilär ikän biredäge uqıtuçılar.

Konkurs şartlarınıñ iñ qatlawlısı bulıp üz-üzeñä analiz yasaw, xezmäteñne, üz potensialıñnı bäyäli belü tordı. Küplär öçen bu ber yaqtan yaña, awır mäs''älä bulıp toyılsa, ikençe yaqtan, eçke rezervlarnı mobilizatsiälärgä öyränü öçen bik yaxşı alım buldı.

Ä inde bäygeneñ näticälärenä kilsäk, barlıq kürsätkeçlär buyınça da iñ yaxşı näticälär kürsätüçe Bitken awılı başlanğıç mäktäbe uqıtuçısı Svetlana Axunova buldı. 28 yäşlek Svetlana xanım tuğanda uq pedagog bulıp tuğan diärlek. Qazan däwlät pedagogiä institutınıñ tatar tele häm ädäbiät bülegen tämamlap qaytuı anıñ tumıştan kilgän säläten tağın da üsterergä, kamilläşterergä yärdäm itkän.

Şulay itep, tatar tele uqıtuçıları arasınnan berençe urınnı Svetlana xanım Axunova aldı. Aña “Master-klass”, yäğni “İñ osta uqıtuçı” digän isem birelde. Şulay uq Raxmanqul awılınnan Zöhrä Adıyıwa, Äceğoldan Älfiä Xäsänova, Şäkürdän Asia Gil''manova, Ärtä Şiğerennän Ğäzizä Barxaevalar da bik zur kürsätkeçlär kürsättelär. Üzeneñ yağımlılığı, här balanı ayırıp, iseme belän endäşep balalarnıñ küñelen yawlap ala belüe öçen Aqbaş awılınnan Miläwşä Gabdraxmanovağa “İñ kürkäm uqıtuçı” iseme birelde. Ä Tübän Äridän Gölçäçäk Nusratova “İñ yäş uqıtuçı” isemen aldı.

Gölçäçäk äle çınlap ta bik yäş, täcribäse dä bik az. Şulay bulsa da anıñ qıyulığı, bäygedä axırğa qädär qala aluı maqtawğa layıq. Gölçäçäk üze biredä qatnaşuına bik quanuın, bik küp yaña närsälärgä öyränüen belderde.

Konkursta qatnaşuçı ber genä uqıtuçı da iğtibarsız qalmadı, härbersenä dä qimmätle büläklär birelde. Konkursnıñ general'' sponsorı itep Yekaterinburg şähärendä eşläp, tatar millätenä igelekle yärdäm kürsätüe belän dan totqan Milli Media-Xolding iğlan itelde. Xoldingda nigez saluçı Rinat Sadriev, Rinat Askarov, Al''bert Abzalov barlıq matdi çığımnarnı häm büläklärne üz cilkälärenä kütärdelär.

Tatar tele uqıtuçıları üzlärenä mondıy iğtibarnı berençe kürülären äytep, bik tä''sirländelär. Alarnıñ awır xezmäten bolay bäyäläw alarda yaratqan eşlären tağın da yaratıp başqarırğa omtılış tudırdı.

Konkursnı oyıştıruçılar şulay uq Bötendönya tatar kongressı başqarma komitetına häm Tatarstannıñ daimi wäkillegenä bik räxmätle. Alarnıñ yärdäme, qayğırtuçanlığı härdaim sizelep tordı.

Başqort tele uqıtuçıları konkursı Yuğarı Pışma şähärendä uzdırıldı. Başqortstannıñ Sverdlov ölkäsendäge daimi wäkile Näfisä xanım Tyumenseva söyläwençä, bu konkurs ta bik yuğarı däräcädä ütkän.

Şulay itep, Sverdlov ölkäse mäğärif üsterü institutı metodistı Zäytünä xanım Şäymöxämmätova başlanğıçı belän başlanğan bu igelekle eş milli mäğärif tormışında iskitärlek zur waqiğa buldı.

Fäwiä Safiullina, Yekaterinbur

XS
SM
MD
LG