Accessibility links

Кайнар хәбәр

Putin YUKOSqa qarata qaraşın yomşartamı?


Rusiä häm Yevropa Berlege sammitında nindi genä möxim mäsälälär tikşerelmäsen, Yukos kompaniäse tiräsendäge xällär iğtibarsız qala almıy. Çärşämbedä Rusiä prezidentı Vladimir Putin bu cancal başlanğannan birle berençe tapqır Yukos faydasına belderü yasadı. Rimda jurnalistlar aldında çığış yasap, Putin, Rusiä xökümätneñ, Yukosnıñ litsenziäsen alu niätenä tänqit belderde. Bu Yukosqa bulğan mönäsäbätneñ yomşaruwın añlatamı?

Başta şunı äytim, xörmätle tıñlawçılar. Berniçä kön elek Rusiäneñ general prokuraturası Tabiğıy baylıqlar ministrlığına möräcägät itep, Yukos kompaniäseneñ litsenziä kileşülären ütäwen tikşerergä sorağan ide. Qayber mäglümätlärgä qarağanda bu tikşerülär Yukosnıñ Irımbur häm Samardagı yatmalarında bara. Älegä bäylänerlek berni tabılmağan, ämmä çärşämbedä Ministrlıq başlığı Vitali Artyuxov, "Rossiskaya gazeta"ğa birgän äñgämäsendä, Yukosnıñ litsenziäsen tartıp alu ixtimalın inde äytep quydı. Yänäse, aksiäläre tuñdırılğan kompaniä belän xezmättäşlek itü, ministrlıqnıñ abruyını töşerä. Aksiä tuñdıru ber närsä, Yukos citäkçeläre äytüençä, bu çara kompaniä eşçänlegenä älegä berniçek tä tä''sir itmi. Ä menä litsenziäne alu – eşçänlekne tuqtatu digän süz.

İtaliädä säfär yörgän Rusiä prezidentı qulına bu gäzit niçek kilep kergänder, ämmä şul uq könne Rimda, jurnalistlar aldında çığış yasap, Putin, minisirlıqnıñ bu niätenä qarşı çıqtı:

Audio

"Yukosnıñ litesenziäsen alu kebek adımnar şik uyata. Ber räsmi oyışma aksiälärne tuñdıra, ikençese şul nigezdä litsenziäne ala. Şundıy xis qala di Putin, äyterseñ däwlät bu kompaniäne beterergä teli, däwlät üz aldına andıy maqsat quya almıy."

Putin, monıñ işe adımnar iqtisad öçen tiskäre näticälär kiterergä mömkin dide, häm xökümät bu adımnan totılıp qalır, digän ömeten äytte:

Audio

Şulay itep, berniçä kön elek kenä Yukos mäsäläsendä bernindi satulaşu bulmayaçaq, yarsınuığıznı tuqtatığız, dip cikergän prezident, Yukos faydasına berençe belderüen yasadı. Bu närsä: Yukosqa qarata qaraş üzgärü me, ällä Könbatışnı tınıçlandıru süzläreme.

Mäglüm ki, Yukos tiräsendäge xällärgä Könbatış borçılu belderä. Atnakiç könne Standart & Poors agentlığı, ägär Yukos tiräsendäge xällär Rusiädän kapital ağıluğa kiterä ikän, bez Rusiäneñ xalıqara reiting mäsäläsen qabat küzdän kiçerä alabız, digän belderü yasadı.

Küptän tügel Yekaterinburda alman kanslerın qunaq itkändä, Rusiäneñ investitsiä däräcäseneñ kütärelüwe belän maqtanğan häm çit il eşquarların Rusiägä investitsiä kertergä öndägän Putin öçen bu, älbättä, quanıçlı xäbär bulmas ide.

Ali Gilmi, Praga
XS
SM
MD
LG