Accessibility links

сишәмбе, 6 декабрь 2016, Казан вакыты 03:44

Qazanda “Kileşü häm tatulıq” köne saylaw aldı agitatsiäse häm propagandası könenä äylände


Mäğlüm ki “Kileşü häm tatulıq” köne 1996nçı yılda Boris Yel'sin färmanı belän “Biek Oktäber revolyutsiäse” bäyräme urınına kertelgän ide. Niätlär izge ide- oktäber inqilabında ata ulnı belmiçä qanğa batıp suğışqan häm sovet çorında xäterendä şul qarşılıqnı saqlap yäşägän xalıq demokratiä çorında tatulaşırğa tieş ide. Läkin bol'şevik varisları KPRF-kommunistlar firqäse tatulıq könendä üzläşterdelär. Xalıqnıñ zur ğına ber qatlamınıñ sovet çorın sağınıp yäşäwlärennän osta faydalanıp “Kileşü häm tatulıq” könendä kommunistik mitinglar häm demonstratsiälär ütkärep säyäsi tabış cıya başladılar. Bıyılğı “Kileşü häm tatulıq” könen Tatarstan kommunistları saylaw aldı agitatsiäse forsatı itep qullandılar. Üzäk yal parkı yanında başlanğan häm İrek mäydanında däwam itterelgän mitingtağı çığışlarnıñ barısı da diärlek menä bolayraq cöplände.

Kommunistlar üzlären aldağı saylawlarda “Единая Россия” belän genä köndäşlek itärlek töp köç dip sanıylar. Ä “Единая Россия” ne töşerep qaldıru öçen alarnıñ “ütergeç“ dälilläre bar. Bu “Trudovaya Rossiä” firqäse wäkile Mariä Kapralova çığışınnan özek. Anıñ äytüençä xalıqnıñ xäyerçe xälendä näq menä şul “Единая Россия” täşkil itkän Rusiä xakimiäte ğäyeple. Alar xalıqnıñ mölkäten tartıp alğanda bu reformalar dilär, ä xalıq mölkäten qaytarıp alırğa teläsä bu ekstremizm dilär. Kommunistlar xalıqnı qızıqtırırlıq taläplär dä quyalar. Bu inde “cirne krästiännärgä” “fabriklärne eşçelärgä” digän kebek ük qızıqtırğıç yañğırıy. Mondıy şiğärlärne köngä 5 tapqır qabatlap torsañ da yarıy. Qazannıñ Mäskäw rayonınnan Duma saylawlarına nämzät bulıp terkälgän kommunist Näsimä Stolyarova şulay eşläde dä. Ul 2 qabat park yanında da İrek mäydanında da çığış yasadı.

Mäğlüm ki “Kileşü häm tatulıq” köne kertelgännän birle anıñ cämğiätne küpme däräcädä tatulandıruın küzätep, tikşerep toralar. Bıyıl Rusiyädä ütkärelgän sotsiologik soraşular xalıqnıñ 44 protsentı “Kileşü häm tatulıq” könen barı tik yal köne dip kenä sanawların kürsätkän. 40 protsentı äle dä oktäber bäyräme dip qabul itä. Barı tik 16 protsentı ğına tatulaşu köne dip qabul itä. Şulay itep Boris Yel'sinnıñ izge niätläre bik awırlıq belän tormışqa aşa ikän. Xalıq oktäber inqilabınnan çitläşä barsa da kileşü tatulıqqa da älläni yaqınaymıy. Tatarstanda bu tendensiädän ayırım utraw bulıp qala almıy küräseñ. 7nçe noyäber könne Qazanda uzğan kommunistlar mitingı turında 7-8 yullıq berençe räsmi xäbär miting tämamlanırğa yartı säğät qala dönya kürde. Anda “şundıy-şundıy miting uzdı, anda 1000 meñ keşe qatnaştı”- dielgän ide. Ällä könneñ yañğırlap toruınamı mitingta xättä xalıq arasında torğan militsiä xezmätkärlären dä sanap 500dän dä artıq keşe yuq ide.

Yunıs Ätnäle.

XS
SM
MD
LG