Accessibility links

шимбә, 10 декабрь 2016, Казан вакыты 04:21

[ xikmätle xällär ]


Bu atnadağı iñ xikmätle xällär saylaw belän bäyle. Başlandı ul närsä. Kemneñ qayçan televizor, radio aşa borçaq sibüe öçen jiräbä saldılar. Qolaqlarığız ğına çıdasın. Ay buyı wäğdä biräçäklär – “min deputat bulsam, fälän itäm - tögän itäm. Minem partiä şundıy äybät, ä başqalar puçtäk. Barı bez genä xalıqnı yaratabız.”

Annarı bergä cıyılıp, üzara tel köräştergänen televizor aşa kürsätäçäklär. İñ däräcäle, iñ şäp keşelär cıyıla torğan firqä äytkän: “ Ä nigä bez başqalar belän keşe aldında tartqalaşıyq? Kem alar ul qädär bezneñ belän ayaq teräp söyläşergä? Yuq, ağay-ene, bez üzebez alay abruynı töşermik, ä yärdämçelärebez, enekäşlärebez belän köräşep qarasınnar, annan kürerbez.” Xäterlisezme, şundıy äkiät bar. Ber xäyläkär urman xucası yarışqa üze çıqmıy, başta enekäş belän yögereşegez, dip quyannı yarışqa çığara. Yänäse, quyannı uzsağız, minem belän yarışırsız.

İnde ay buyı quyannarnıñ ayu belän yögereşkänen, tank belän su astı köymäse suğışqanın qarap torırbız. Bügen sin türä, yäki deputat, ä irtägä min bulam. Ä sin ğadi cäyäwle yäki tramvay passajirına äylänäseñ. Ä kemneñ üze teläp mersedesnı tramvayğa alıştırası kilsen? Menä şuña kürä yarış qatı bulaçaq.

Tatarstan belän kürşe respublikada prezident saylawına äzerlänälär. Kemne saylaw – kürşelärneñ eçke eşe. Tem boleye, eçke eşlär ministrlığı anda bik köçle, dilär. Barıber kürşedäge tälinkä watışu Tatarstanğa da işetelä. Ğäcäp tä tügel. Tatarstandağı küp kenä kürenekle millättäşebez Başqortstanda tuğan. Ägär dä Yañawılda, Teteşledä, Baltaçta yäşäwçe tatarlar uzğan yılnıñ közendä başqa millät wäkile itep yazılğan ikän – dimäk Qazanda yäşäwçe şağir yäki cırçı, taşçı üzen nindi millät wäkile ikänen yañadan uylarğa tieş. Menä şundıy zaman kilmäsen öçen uzğan yılda Tatarstan sänğätkärläre kürşe respublikadağı qärdäşläre yanına barıp konsertlar kürsätte. Ämma ul waqıtta küp kenä cırçılarnı kertmädelär. Tatarça cırlaw uzğan yılnıñ oktäber-noyäber aylarında anda xilaf sanaldı. Ä menä bıyıl, Allağa şöker. Könbatış rayonnarda konsert kürsäter öçen Qazanğa kilep, populyar artistlarnı zur aqçalarğa gastrol'gä çaqırğannar. Xämdünä Timerğalieva, Gabdelfät Safin, Zölfiä häm Cewit Şakirovlar eşneñ närsädä ikänen belä. Alar anda barıp cırlıy da, konferans'ye şunda cıyılğan tatarlarnı räsmi kandidat öçen tawış birergä ügetli.

Şulay da, aqçası zur di bit. Qayber bilgele cırçılarıbız birgänneñ bitenä qaramıym dip säyäsi mäğnäle konsertlarğa barırğa riza bulğan. Bälki qayber tıñlawçılarıbız alarnı kürep ta qalğandır. Menä şundıy xikmätlär bula. Kiçä millät berdäm bulsın, yözen saqlasın dip sayrıybız. Bügen kesä tulsın, milläte çurt s nim, dip qul seltibez.

Yañawıldan şaltıratalar. Anda Rusiäneñ iñ zur citäkçeläre yaqlıy torğan firqä reklamasına ike prezident quyılğan. Berse Berdäm Rusiäneñ räistäşe Mintimer Şäymiev, ikençese Başqortstannıñ xäzerge citäkçese. Soñğısı barı tik töbäk isemlegendä kandidat. Yañawıldağı reklama räsemendä ike prezident igezäk tuğan kebek toralar ikän. Bu yulı reklama Duma saylawı öçen tügel, ä Başqortstan prezidentı bulıp saylanu öçen şulay bizälgän. Ä bit canisäp barışı buyınça qarasañ, Yañawılda tatarlar yuq diärlek. Nişläp ul Tatarstan citäkçeseneñ räseme belän xalıqnı därtländerälär ikän?

Tağın ber xikmätle xäl. Tatarstanda däräcäle urınnarda eşläp Mäskäwgä kitkän ber yazuçıbız İnternetta şundıy äñgämä birgän. “Mäskäwgä kitep, Tatarstan xakimiäte tä'sirennän qotılğaç, üzemne iñ bäxetle keşe dip sanıym”, digän ul. Menä şulay, barı tik milli mädäniät belän genä yäşägän häm ikmäk aşağan keşe millätneñ märkäzennän Mäskäwgä barğaç, çın bäxet xisläre kiçerä. Soraw tua. Ä millät, ğäziz Qazanıñ sinnän qotılğannan soñ çın läzzät xisläre kiçerä başlasa, nişlärseñ? İñ xikmätlese şul, älege Mäskäw tatarı ädibe Tatarstannan Dumağa saylanırğa kandidat bulıp terkälgän.

Rimzil Wäli. Qazan

XS
SM
MD
LG