Accessibility links

җомга, 9 декабрь 2016, Казан вакыты 01:16

Ğiraqtağı wazğiät: Qızıl Xac oyışması Bagdad häm Basrada bülekçälären yaba


Şimbä könne Xalıqara Qızıl Xac oyışması Bagdad häm könyaqtağı Basra şähärendä ofisların yabuwı turında belderde. Oyışma wäkile Florian Westfal süzlärençä, Qızıl Xac üz xezmätkärläreneñ iminlege öçen borçıla. İlneñ tönyağındağı bülekçä älegä eşen däwam itäçäk. Uzğan ayda Oyışmanıñ Bagdadtağı ofisı yanında bulğan şartlaw näticäsendä 12 keşe xäläk bulğan ide.

Bügen Bagdadtan könbatışqa urnaşqan Falluca şähärendä Amerikan qärwanı barğan yulda bomba şartladı. Näticädä ike xärbi xäläk buldı. Şulay itep, bu ayda ğına xäläk bulğan amerikan xärbiläre sanı 34kä citte.

Kiçä Tikrit şähärendä amerikannarnıñ Black Hawk boralağı qazağa oçradı. Andağı 6 xärbineñ barısı da xäläk buldı. Bu qazanı tikşerü däwam itä. Ämmä bügen amerikan polkovniğı Steve Russel boralaqnıñ bärep töşerelgän buluın tanıdı:

Audio (Steve Russel)

"Black Hawk qazağa oçradı, qorbannar bar. Bez qazanı açıqlawda yärdäm itäbez. Ämmä boralaq cirdän bärep töşelgän bulırğa tieş."

Russel süzlärençä, uzğan töndä koalitsiä köçläre, qaza bulğan urın tirälärendä, hawa häm artilleriä xöcümnäre yasağan:

Audio (Steve Russel)

"Bezgä xöcüm bulğan bar urınnarnı utqa tottıq. Berençedän bez ul xöcümçelärne yuq itergä, ikençedän, alarğa üzebezneñ köçne kürsätergä telibez."

Tikrit uramnarına tanklar, xärbi maşinalar kertelgän. Xöcüm näticäsendä şähär çitendäge buş yortlar cimerelgän, dip xäbär itelä.

Bügen däwlät sekretare Colin Powell, Londonda ğäräp telendä çığa torğan "Şarq Äl-Äwsät" gäzitenä birgän äñgämäsendä, Ğiraq üzägendä amerikan xärbilärenä bulğan xöcümnär -- citdi problema, ämmä qotıçqıç närsä, tügel, dip äytte. Gäzit, anıñ "bu xöcümnär artında kem torğanın tögäl belmim" digän süzlären kiterä. Powell süzlärençä, Bush administratsiäsendä, amerikan xärbilären Ğiraqtan çığaru turında, älegä ber süz dä yuq.

Bügen Powellnıñ urınbasarı Richard Armitage, Bagdadta ütkän matbuğat oçraşuında, soñğı xöcümnärgä qaramastan, Quşma Ştatlar aqıl belän eş itä, dide. Berük waqıtta Armitage, başqa illärne Ğiraqqa ğäskär cibärergä çaqırdı.

Ali Gilmi
XS
SM
MD
LG