Älege könnärdä Qazan Kremlennän çittäräk yörüçe Mintimer Şäymiev sotsial'' häm iqtisadi obyektlarnı qarap yöri. Şul uq düşämbe könne ul Ägerce timer yul stansiäseneñ açılışına bardı. Häm şul düşämbe programmasında Tübän Kamada nefteximiä tarmağında yañalıq bulğan kreking zavodına nigez taşı salındı. Eş Mintimer Şäymievneñ boralaqqa utırıp törle töbäktäge qaynar häm qızıq noqtalarğa baruda ğına tügel. Neft'' eşkärtü cihazlarnıñ niqädär möhim häm kiräk buluın härkem añlıydır. Neft'' taba torğan töbäklärdä andıy zavodlar aqça yasaw maşinasına bärabär.
İqtisad häm xucalıq eşläre turında söylägändä, şimbä könne Qazannıñ üzägendä näq Qaban küle yarında urnaşqan “Basketxoll”nıñ eçendä häm tışında bulğan tamaşalarnı iskä almıy bulmıy. Uñış bäyräme berençe tapqır biredä ütkärelde. Respublikanıñ barlıq rayonnarınnan da ikmäk üsterüçelär “Basketxoll” qarşında matur itep bizälgän kürgäzmäne qaradılar. Tämle azıqlar, matur bizäklär, balıqlar, qoş-qortlar, xätta bürelär qaraçqıları bügenge tabiğätne awıl tormışın küz aldına kiterergä yärdäm itä. Uñış bäyrämendä 7 meñläp keşe qatnaştı, diärgä bula. “Basketxoll”nıñ zur zalına menä şul qädär keşe sıya. Ğädättä basketbolçılar çabışa torğan mäydançıq säxnägä äwerelde. Ä säxnäneñ türendä maqtawlı qunaqlar buldı. Mintimer Şäymiev bıyılğı 5 million tonna ikmäk uñışınıñ ähämiäte nigezläre turında çığış yasadı. Çınnan da, tatarstanlılar bıyıl awıl xucalığı tarmağında bik zur uñışqa ireşte. Börteklelärne genä tügel, başqa üsemleklär dä görläp üskän. Awıl keşeläre xäzerge şartlarda da qatı eşli ikän. Respublikada bıyıl ğına da 2 meñ kombayn, 4 meñ traktor satıp alınğan. “Tatneft''” berläşmäse aldan tüläwsez häm oçsızlı bäyägä yağulıqnı yaz köne awıl xucalıqlarına birgän. Neft''çelärneñ şuşı yärdäme genä dä yartı milliard sum tora ikän. Qısqası, bäyräme dä, awıl xucalığın zurlap artistlar çığış yasawı da şäp buldı. Rusiäneñ xökümät başlığı urınbasarı awıl xucalığı ministrı Aleksey Gordeyev tatarstanlılarnı Vladimir Putin isemennän qotladı, Mintimer Şäymievkä awıl xucalığı kompleksın kütärüdäge xezmätläre öçen şuşı tarmaqnıñ yaña medalen tapşırdı.İnde ruxi-mädäni tormışqa kilsäk, Kamal teatrında Tufan Miñnullinnıñ “Şulay buldı şul” pyesası buyınça quyılğan spektakl'' cılı qabul itelde. Premyeranıñ öçençe könendä Kamal teatrı zalınıñ altınçı rätendä näq urtada iñ xörmätle tamaşaçı utırdı. Anıñ kem ikänlegen üzegez çamalarsız, çönki bu isem bügenge tapşıruda yış qabatlandı. Qısqa ğına äytkändä, Qazan Kremlendä utırmağan könnärendä M.Şäymiev ğädättägedän dä aktivraq xäräkät itä.
