Accessibility links

сишәмбе, 6 декабрь 2016, Казан вакыты 08:59

Tatar televidenie jurnalistları «TEFİ-region» bäygesendä qatnaşmıy




11nçe noyäberdä Qazanda TEFİ-region digän televidenie bäygese başlanıp kitte. Rusiä televidenieseneñ akademiäse bıyıl inde ikençe tapqır, Rusiäneñ cirle telekompaniäläre öçen şuşı bäygene uzdıra. Bäygeneñ Qazanda ütkärelä torğan öleşenä 50-60 lap televidenie şirkäte qatnaşa. Şuşı telekompaniäneñ 13se Tatarstannan. Läkin Çallı telekompaniäsennän tış berse dä, bäygegä tatar telendäge tapşırunı cirbärmägän. Märtäbäle jyuri xozurına Älmät, Çallı, Tübän Kama, Qazan televidenie jurnalistları rus telendäge programmaların ğına täqdim itte. Tatarstan elektron mäğlümat çaralarınnan tış icadi bäygedä Mäskäw, Nicğar, Smolenskiy, Vladimir, Tula, Çiläbe häm erele-waqlı Rusiä şähärläre telekompaniäläre qatnaşa. Kürşe Başqortstannan Däwlät teleradiokompaniäse wäkilläre, «Böten Ufa» prodyuserlar üzäge, Kümertaw şähärennän ber telestudiä xezmätkärläre kilgän. Başqortstandağı tuğannar da, milli telle tapşırular alıp kilmägän.

Ğadi TEFİ – federal kanallar öçen ütkärelsä, «TEFİ-Region» digänende cirle telekompaniälär qatnaşa. «Zur»ısı kebek uq, «keçe» TEFİ da televidenie xezmätkärläre öçen iñ ğibatlı professional büläk bulıp sanala.

Läkin Tatar jurnalistları şuşı däräcäle bäygedä qatnaşmağan. Teletapşırular alıp baruçılar assotsiätsiäse räise Eduard Sagalayev äytkänçä, milli tellärdä eşläwçe teleşirkätlär üzläre bäygedä qatnaşırğa teläk beldermägän, oyıştıruçılar tarafınnan icadi äsärlär urıs telendä genä bulsın digän şart quyılğan. Eduard Mixail ulı üzem Sämärqändta tuıp üstem, üzbäkçä beläm, tatarça da berär niçek çamalar idek, dip añlatırğa tırıştı. «Azatlıq» radiosı xäbärçäseneñ milli tele-jurnalistikasınıñ rus telgändägese belän köndäşlelek itä alu-almawı xaqındağı sorawına da cawap birde. Anıñ fikerençä, köndäşlek itä ala. Xätta ki, ul şaqtıy tabışlı eş te bulırğa mömkin.

Eduard Sagalayev töbäk teleşirkätläreneñ eşen bäyälägändä, ber berse arasında zur ayırmalar barlığı turında äytte. Mäsälän neft tabıla torğan töbäktä urnaşqan telekompaniäneñ finans mömkinlekläre Piterburdağı televidenie studielerennen zurraq bulırğa mömkin, ä däwlät byudjetınnan aqça alıp toruçı telekompaniälärneñ xäle maqtanırlıq tügel ikän. Läkin Eduard Sagalayev fikerençä böten närsä aqçağa ğına qaytıp qalmıy. Yış qına şuşı TEFİ bäygelärdä ciñgännän soñ sälätle xäbärçelärgä federal kanallarda eşlärgä täqdim itälär.



Bäygedäge yarışlar berniçä yünäleştä bara, jyuri täqdim itelgän icadi eşlär arasında iñ yaxşı yañalıqlar tapşıruı, iñ yaxşı alıp baruçı, iñ yaxşı analitik tapşıru, reportaj, dokumental` fil`mnı açıqlarğa tieş bula. Näticälär nigezdä inde bilgele bulğança, oyıştıruçılar alarnı bäygeneñ soñğı könenä xätle iğlan itmäyäçäk. Bu istälekle çara 3nçe noyäberdä bulaçaq.

Bikä Timerova.

XS
SM
MD
LG