Waşington Ğiraqtağı säyäsi-iqtisadıy eşlärdä sönnilärneñ dä qatnaşuın teli

AQŞ däwlät sekretare urınbasarı Richard Armitage Waşington Ğiraqtağı yaña iqtisadıy häm säyäsi sistemada ildäge sönnilärneñ dä qatnaşuın teli dide. Qahirädä matbuğat oçraşuında çığış yasap Armitage bu Ğiraqta AQŞ xärbilärenä qarşı höcümnärne kimetü maqsatındağı plannıñ ber öleşe bulaçaq dide. AQŞ xärbilärenä qarşı höcümnärneñ küpçelege Bağdadtan tönyaq könbatıştağı Sönnilär yäşägän cirlärgä turı kilä. Armitage älege çığışına qädär barşa ber oçraşuda atna axırında Riadta bulğan şartlawlar belän Fälestin mäs'äläsen bergä bäylämäskä çaqırdı:

AUDİO: Äle Usama bin Laden Fälestin süzen kütärä başlağançığa qädär ük, Äl-Qaidä Könbatışqa häm Söğüd Ğärabstan patşalığına qarşı ide. Şuña kürä min Ğäräp-İsrail' nizağına çişeleş tabu, ni qädär genä möhim bulmasın, Quşma Ştatlarğa, Könbatışqa häm Söğüd Ğärabstanı Patşalığına qarşı terrorçılıqnı tuqtataçaq dip uylamıym.

Armitage şulay uq AQŞqa, Könbatışqa häm Söğüd Ğärabstanı Patşalığına qarşı terror höcümnäre Fälestin mäs'äläsen çişmiäçäk dide.