Accessibility links

дүшәмбе, 5 декабрь 2016, Казан вакыты 11:32

Xodorkovskiy irekkä çığarılmadı. Monda politik motivlar töp rol uynıy kebek


Mäskäv şähär mäxkämäse YUKosnıñ elekke räise Mixail Xodorkovskiynı iñ kimendä yıl azağına qädäre türmädä totu qararın üzgärtmäde. Yabıq işeklär artında ike yarım säğätkä suzılğan tıñlaulardan soñ, öç xakimnan torğan mäxkämä ber nindi dä añlatma birmiçä Xodorkovskiynı xökem protsesına qädäre irekkä çığaru turındağı advokatlarnıñ möräcğäten kire qaqtı.

Xodorkovskiy irekkä çığarılğan xäldä ildän kitmiäçäge turında väğdä birergä häm käfalät yäğni zalog tülärgä täqdim itsä dä häm 40-lap tanlğan säyäsmän, keşe xoquqları aktivistları anıñ öçen garantiä birsälär dä, mäxkämä anı irekkä çığarunı kire qaqtı. Xodorkovskiynıñ advokatı Anton Drel bu xaqta bolay dide.

Audio

Mäskävdäge advokatlar törkeme, Bäysez Ekspertlarnıñ Legal Şurasınıñ räisäse Maria Polyäkova, qanunğa esasän mondıy adım tik ğädättäntış xällärdä genä atlana, prokuror ğäyeplänüçeneñ qaçarğa tırışuın ispatlarğa tieş. Bez andıy dälil işetmädek dip belderde. Ekonomik ğäyeplävlär säbäple keşene törmädä totu xätta Rusisiä şartlarında da ğädättäntış küreneş. Bu inde Xodorkovskiy östennän protsesınıñ täbendä politik motivlar yata digän şik tudıra. Anıñ prezident Putingä oppozitsiädä torğan demokratik köçlärne yaqlauı ber kemgä dä ser tügel. Mäxkämäneñ Xodorkovskiynı irekkä çığarmauınıñ säbäplären añlatmauı da säyer. Bälkim açıqlau soñğaraq bulır. Xodorkovskiynıñ advokatı Drel, prokuror Xodorkovskiy cämğiätkä qurqınıçlı şäxes dip beldergännän soñ mäxkämäneñ andıy qarar qabul itäçägen kötep bula ide dip äytte häm kiläçäktä nindi çaralar kürü mäsäläsen Xodorkovskiy belän tikşeräçägen belderde.

Audio

Xakimiätlärneñ Xodorkovskiy mäsäläsenä mönäsäbäte tik salım tülämäv yäisä dävlät milken üzläşterü ğäyeplävläre belän bäyle xökem protsesı ramnarınnan uzıp kitte. Washington Post gazetasınıñ yazuına qarağanda, Xodorkovskiy tarafınan çaqırılğan ike amerikan advokatına viza tämin itkän şirkät, vizağa qaramastan, alarğa Russiägä kerergä rüxsät itelmiäçäk yäisä alar çitdi problemmağa duçar bulaçaqlar dip kisätkän. Şirkätneñ Mäskäv buyorında uzğan Sişämbedä tentü ütkärelgän. Şul säbäple advokatlar Londonğa kilep töşsälär dä, Mäskävgä barudan soñğı minutta vaz kiçkännär. Miras Fondınıñ başlığı Yevgeniy Volknıñ belderüenä qarağanda, Xodorkovskiy irekkä çıqqan xäldä, anıñ politik häm ekonomik manverlar öçen kiñeräk mömkinlege bulır ide. Ä inde Troyka Dialog tikşerü üzägeneñ başlığı James Fenknerneñ süzlärençä, Saylaulardan alda ul irekkä çığarılsa, politik köräş bik nıq qızıp kitäçäk, yaralı häm bay keşeneñ närsälär eşli alaçağın aldan farazlau bik qıyın. Xodorkovskiy mäsäläsendä prezident Putin dä, Kreml dä, prokuratura da närsä genä äytmäsennär, anıñ qulğa alınuı da, protsesnıñ barışı da, ğadellek buldıru belän tügel, ä Putinneñ potansial köndäşen auızlıqlau-cazalau belän bäylängän.

Färit İdelle, Praga.
XS
SM
MD
LG