Accessibility links

пәнҗешәмбе, 8 декабрь 2016, Казан вакыты 17:19

Yäşlär komsomol sıman berdäm häm köçle oyışmanıñ barlıqqa kilüen teli.


Saylaw aldı kampaniäse yuğarı uqu yortlarına, yäşlär ölkäsenä dä ütep kerde. Törle firqä tarafdarları yäşlär uqığan, yal itkän, yäşägän urınnarğa öndämälär tarata, açqa yäki ideya belän qızıqtırıp, üz çaralarında qatnaşırğa çaqıra. Berdäm Rusiä firqäseneñ respublika konferensiäsenä yäşlärne niçek cälep itkännärder, tögäl äytä almıybız. Ämma şunısı xaq: respublika rayonnarınnan barlığı 357 delegat häm 100dän artıq qunaq kilde häm yäşlär oyışmasınıñ konferensiäsendä qatnaştı. «Berdäm Rusiä» xakimiät firqäse bulğaç, konferensiäne oyıştıruğa, firqäneñ yäşlär qanatı ğına tügel, yäşlär eşläre ministrlığı da üz öleşen kertte.

«Aq bars» üzägenä cıyılğan yäşlär arasında ministrlıq üz qanatı astında bulğan wäkilläre kürende. «Ez tabarlar», «Sälät» oyışmaları, «Forpost» saqçılar törkeme, Şayannar häm tapqırlar klubı häm başqa studentlar berlekläre wäkilläre buldı anda. «Berdäm Rusiä»gä teläktäşlek kürsätkän «Tatarstan - yaña ğasır» xäräkäteneñ yäşlär qanatı äğzäläre dä konferensiädä qunaq bularaq qatnaştı.

Rusiä häm Tatarstan gimnnarı belän tınıç qına başlanıp kitkän bu çaranıñ axırı kötmägänräk bulır dip, uylawçılar siräk bulğandır. Läkin bu xaqta soñraq. Başta yäşlärneñ üzläre turında.

Konferensiädä çığış yasağannarnıñ kübese berdäm häm zur yäşlär oyışmasınıñ kiräklege xaqında äytte. Elekke zamandağı kebek zavodlarda yäşlär öçen kvotalar, transportta yörü öçen taşlamalar soradı. Firqäneñ Tatarstan bülege citäkçese Färit Möxämmätşin da, çığış yasap, yäşlärne berläşterü kiräklege turında äytte. Täcribäle säyäsätçe Färit äfände üzeneñ süzläre belän yoqımsırap utırğan yäşlärne canlandıra häm üzen yarattıra aldı. Ul yäşlär parlamentı kiräk, diep mart ayında saylanaçaq Däwlät Şurasınıñ berençe qararı şul xaqta bulır, dip wäğdä itte.

Ä bu häm yäşlärgä wäğdä itelgän başqa eşlär tormışqa aşsın öçen, firqäneñ küpçelek tawış belen saylawlarda ciñüe kiräk, dielde. Saylaw aldı eşlären nıqlabraq alıp baru öçen küräseñ, firqäneñ yäşlär qanatı citäkçesen dä alıştırdılar. Anıñ belän citäkçelek itkän, televidenie jurnalistı Dmirtiy Vtorov wazifasınnan çigende, häm anıñ urınına yäşlär eşläre ministrı urınbasarı Andrey Kondratyev saylandı.

Bıkä Tımerova

XS
SM
MD
LG