Accessibility links

чәршәмбе, 7 декабрь 2016, Казан вакыты 11:48

Ägerce belän Norlatta yaña timer yul vokzalları açıldı


Respublikada bu könnärdä şaqtıy aktiv sotsial häm iqtisadi tormış bara. 12nçe noyäber könne Tatarstan Däwlät Şurası däwlät tözeleşe, cirle üzidarä häm tışqı elemtälär komissiäsendä Respublika prezidentın saylawları turındağı qanun tikşerelde. İntertat.ru gäcite xäbärlärenä qarağanda, qanun nigezendä dä bez prezidentnı elekkeçä saylayaçaqbız. Yaña qanun Rusiä xalıqlarınıñ saylaw xoquqları häm Säyäsi firqälär turındağı qanunnarnıñ taläplärenä yaraqlaştırılış eşlängän. Xäzer, mäsälän, prezidentlıqqa nämzätne säyäsi firqä dä täqdim itä ala. Şulay uq qanunda saylaw komissiäläre häm alarnı tözügä qağılışlı yañalıqlar da bar. Tizdän älege qanun Däwlät Şurasınıñ sessiäsendä berençe uqılışta qaralaçaq. Ä menä Tatarstannıñ inde saylanğan prezidentı üzeneñ yalın bik faydalı häm möhim eşlärgä bağışlıy. Respublika mäğlümat çaralarında anıñ här könne qaydadır barıp, närsälär eşlägäne turında şaqtıy küp kürergä bula. Xäyer, xäzer ul kübräk Tatarstan prezidentı tügel, ä Yedinaya Rossiä firkäseneñ Yuğarı Sovetı räistäşe bularaq törle ğämällär qıla. Menä sişämbe könne dä Mintimer Şäymiev Norlatta yaña timer yul vokzalı binasın açuda qatnaştı. Açılış tantanasına Rusiäneñ Timer yulları aksionerlıq cämğiäte citäkçese Gennadiy Fadeev ta kilgän ide. Şul uq könne respublika tağın ber vokzalğa iä buldı. Bu yulı inde – Ägercedä. Şul uq däräcäle keşelär qatnaşlığında ütkän tantanadan soñ, Tatarstan xökümäte belän Rusiä Timer yulları cämğiäte arasında xezmättäşlek turında kileşü tözelde. Anı Gennadiy Fadeyev häm Röstäm Miñnexanov imzaladılar.



Tatarstan yañalıqları belän tanıştırunı däwam itäbez, xörmätle tıñlawçılar. Qazanda II Bötenrusiä TEFİ-region televizion bäygeseneñ finalı däwam itä. Çärşämbe könne bäygedä qatnaşuçılar üzläreneñ hönäri täcribäläre belän urtaqlaştılar, bilgele jurnalistlar ütkärgän master-klasslarda qatnaştılar. Kiçen isä alar Tatarstannıñ mädäniäte belän tanışa aldılar. Salix Säydäşev isemendäge Zur konsertlar zalında TEFİ-region konkursına cıyılğan jurnalistlarğa respublikanıñ sänğät ostaları zur konsert programmasın täqdim itte. 13nçe noyäber kiçendä Piramida küñel açu üzägendä bäygeneñ yabılu tantanası häm ciñüçelärne büläkläw uzaçaq. Läkin aña qädär jurnalistlar äle Qazan belän tanışıp ölgeräçäk, Raifa irlär monastıyrenä ekskursiägä baraçaq. Şulay uq alarnı Rusiä televidenie Akademiäse prezidentı Vladimir Pozdner häm TEFİ-region bäygese jyurinıñ citäkçese Eduard Sagalayev belän oçraşu da kötä. Ä ğadi tatar tamaşaçısına bäygedä tatar programmaları bötenläy dä bulmaw säbäple, Tatarstan telekompaniäläre bulsa da ciñär dip ömetlänergä genä qala.

Gölnaz İlgizär

XS
SM
MD
LG