Accessibility links

шимбә, 10 декабрь 2016, Казан вакыты 23:32

Udmurtiäneñ Mojga şähärendä tuğan tel uqıtuçısı Qazannıñ 1000 yıllığına bağışlap uzdırğan «Tatar qızı» bäygesendä berençe urınğa layıq buldı


Tuqsanınçı yıllar azağında cämğiättäge üzgäreş cilläre Mojgada yäşäwçe tatarlarnı da çitlätep uzmadı. Tuqsanınçı yıllar başında uq respublikada yäşäwçe tatarlar arasında berençe yaña mäçet monda tözelde. Anda tatar ictimaği üzäge dä un yıllap elek oyıştırıldı. Millättäşlärebez başta şähärdä, soñraq respublika külämendä milli bäyrämebez saban tuyın zurlap uzdıruğa ireşte. Tatar ansamblenä cırğa—moñğa häwäs millättäşlärebez cıyıldı, respublikada da, xättä Qazanda uzdırılğan cır konkurslarında qatnaşıp, ciñüçelär isemlegenä kerde. Şundıylardan Quqmara töbägendä tuıp uskän Damir Ğafiätullin häm başqalar.

Tik mojgalılarnıñ aktivlığı kübräk ölkän yäştägelär tormışına üzgäreşlär kertte, mäktäplärdä tatar sıynıfına balalarnı cıyıp, anda tuğan telebezne fän bularaq uqıtuğa ireşügä kitermäde. Berençe sanlı mäktäptä balalar icat yortı citäkçeläre belän kileşenep, tuğan tel tügäräge açıldı, ämma balalar zurraq üskän sayın, alarnıñ tel belän qızıqsınuları kimede, tügäräklär dä tarqaldı.

«Azatlıqnı» daimi tıñlawçılar xäterlider, bıyıl Mojga şähäreneñ berençe sanlı mäktäbendä, nihäyät, tatar sıynıfı açıluı turında xäbär itkän idek. Ütkän atnada radio häm televideniedä tatar tapşıruların alıp baruçı xäbärçelär, mägärif ministrlığınnan belgeç Älfiä Ğaysina, Mojgada bu balalar, ölkännär belän oçraştıq.

Mäktäptä bezne yaqtı yöz belän uqıtuçılar, Mojgadağı milli-mädäni avtonomiä räise İlgiz Qadırov qarşı aldılar.

Berençe tatar sıynıfında ana telen Nädiä Fayaz qızı Wäleyeva alıp bara. Açıq därestä balalarnıñ uqıtuçı belän aralaşuın, apaları sorawlarına cawapların tıñlap, uzğan ike ayda üzgäreşlär zur buluın añladıq. Älege sıynıfta 13 bala uqi, alarnıñ ikese genä mäktäpkä kilgändä tuğan telendä aralaşa belsä, inde başqalarnıñ, bigräk tä qatnaş ğäilälärdä üskän balalarnıñ tele açıluınıñ sere iñ berençe çiratta uqıtuçılarında. Dörestän dä, Nädiä xanım däresne bik qızıqlı, mawıqtırğıç itep alıp bardı. Uqıtuçı ber genä balağa da, ber minut ta hawalanıp utırırğa irek birmi, çänki eş ısulı — bala därestä cäyläşergä tieş. Ber ük sorawğa berniçä bala cawap birep, bu, üz çiratında, temanı üzläşterergä, yaña süzlär öyränergä yaxşı etärgeç bulıp tordı. Balalarnıñ üzläre, apaları belän yazılğan tasmanı bergäläp tıñlıyk äle.

Audio

Nädiä Fayaz qızı Wäleyevanıñ tuğan yağı Tatarstannıñ Arça—Älki töbäge. Yäştän Tuqay yörgän suqmaqlarnı buylap, şağirne xozurlandırğan täbiğät qoçağında, milli moxittä tärbiälängän ul. Şuña da tormışta hönäre itep tatar tele uqıtuçısı belgeçlegen saylağan, Qazan pedagogiä universitetın tämamlap, ğailäse belän Mojgaga kilep urnaşqan. Başta baqçada, soñraq yäşusmerlär belän ozaq yıllar eşlägän, annan soñ anı balalar icat yortına çaqırğannar. Anda tatar tele tügärägenä uquçılar tuplap, alarnı tuğan telebezdä söyläşergä, cırlarğa, biergä öyrätä başlağan, milli bizäklär belän qızıqsındırıp, qul eşlärenä tartqan. Tatarlığı, millilege belän küplärdän ayırılıp tora ul. Minem bu fikerläremne isbatlağanday, Nädiä xanım uze dä äñgämäbezne näq şuşı yunäleştä başladı.

Audio

Bügen Nädiä xanım sıynıfında uquçı balalarda şuşındıy milli canlı bulıp usärlärme soñ, Nädiä Fayaz qızınıñ moña ömete zur.

2003nçe yılda «Söembikä» jurnalı belän «Yaña ğasır» telekanalı Qazannıñ meñ yıllığına bağışlap, tatar qızı isemle konkurs iğlan itkän ide. Nädiä xanım bu xaqta televizion tapşırudan işetep, anda qatnaşırğa niät qıla.

Audio

Ul quyılğan şartlarnı barısında üti, häm anıñ bu bäygedä ciñep çığuın da ğäcäyep waqiğa tügel, ä tabiği xäl bularaq qabul itärgä kiräkter.

Uqıtuçılarınıñ möläyemlegen, uñğanlığın uquçıları da sizemläp tora, anı yaratalar, aña oşarğa tırışalar.

Xämidä Ğayfullina, Udmurtiä.

XS
SM
MD
LG