Accessibility links

дүшәмбе, 5 декабрь 2016, Казан вакыты 11:38

Tatarstanda suqırlarnıñ xälen belüçelär barmı?


Tormış bulğaç bar da bula. Söyeneçe-köyeneçe, tazalığı- baylığı, ğäriplege-fäqirlege bar da yänäşä. Suqırlarnıñ da xalıqara könnäre bar ikän. Ul nindi kön soñ? Bäyräm disäñ gönahı bulır, qayğı köne disäñ dä kileşmäs. Kürü säläte zäğiflängän yä suqırayğan keşelär ğömere buyı qayğırıp qına utırmıy bit inde. Eşli, yäşi tormışın alıp bara. Däwlät, cämğiät yärdämgä kilä. Tatarstanda Gomümrusiä suqırlar cämğiäte eşli, berniçä invalidlar cämğiätläre bar. Älbättä suqırlar problemaları belän Sotsial' tä'minät ministrlığı da şöğellänä. Ä problemalar citärlek. Suqırlar cämğiätennän alınğan mäğlümatlardağıça Tatarstanda 6549 kürü säläte buyınça invalid bar şularnıñ 2200se yäşlär. Kürü säläte buyınça 1 törkemgä kergän invalid, yäğni döm suqır keşe, 1400 sum pensiä ala. Añlaşıla ki xäzerge zamanda mondıy pensiä alğan keşegä berençe problema - eşläp tamaqnı tuydırırlıq, ös-baş alırlıq aqça, xezmät xaqı alu. Ä eş tabuda iñ berençe problema şul. Suqırlar cämğiäte xezmätkäre Larisa xanım añlatuınça suqırlarğa attestatsiälägändä barı suqırlar cämğiäte sistemasına kergän şirkätlärdä genä eşläw xoquqı birälär, qanunnar şundıy. Älege şirkätlärlärdä elementar tormış kiräk-yaraqları citeşterelä häm xezmät xaqı da şunıñ qädär genä. Xäyerçegä cil qarşı digändäy soñı waqıtta şirkätlärgä däwlät yärdäme dä çiklängän. Larisa xanım - suqırlar eşli torğan maxsus oyışmalarğa salım taşlamaları beterelü säbäple alar matdi qıyınlıqlar kiçerälär, çönki başqa şirkätlär belän köndäşlek itä almıylar. Älbättä Tatarstanda kürü säläte invalidları arasında da yaxşı eşlärgä urnaşqan yä bulmasa allahı täğälä birgän başqa sälätläre belän uñış qazanğan şäxeslär dä bar. Cırçı Zakir Şahban pänceşämbe könne Tatarstan rayonnarına gastrol`gä çığıp kitte. Çönki ul härqayda kötep alınğan tanılğan cırçı. Azatlıq radiosına birgän interv'yusendä ul bolay dide. Äye Zakir Şahban kebek uñış qazanğan “suqır cırçı” digän cırlar obrazı bulğan keşelärneñ dä problemaları citärlek. Zakir Şahban könküreş qıyınlıqları kiçermim şöker yaqınnarım, duslarım bar dide. Yalğız qalğan suqırlarğa da reabilitatsiäse üzäge bar ikän. Mäskäw yanındağı üzäktä tüläwsez berniçä ay eçendä suqırayğan keşelärne könküreş problemaların xäl itärgä, nindidä bulsa ğadi genä hönärgä öyrätälär ikän. Läkin monıñ belän genä tormış itü ciñeläyäme soñ? Şuşı könnärdä Qazanda mäğlüm ber säyäsätçe sulağaylar firqäse oyıştırırğa yörüe turında imeş-mimeşlär işetelde. Älege säyäsätçe bu ideyäne bik aktual' dip sanıy ikän. Çönki alğa kitkän çit illär dä xätta sulağaylar mänfäğätläre dä qayğırtıla ikän. Ä Rusiädä sulağaylarnı uñ qul belän yazarğa mäcbüri itälär, unitaz totqıçında sul yaqqa quyu qaralmağan ikän. Qazanda berär yort basqıçına invalid kolyaskası belän töşärlek caylanma quysalar da böten dönyağa şaw itälär. Qaya äle ul suqırlar mänfäğätläre dä, sulağaylar mänfäğätläre.

Yunıs Ätnäle.

XS
SM
MD
LG