Yewropa Berlege räsmiläre äytüençä, Berlekneñ tışqı eşlär komissionerı Chris Patten bu atnada Ukrainağa barıp Tuzla utrawı yanında Russiäneñ damba tözeleşe belän tanışqan. İke atna elek Rusiä xökümäte Ukraina belän söyläşülär ütkärü turında kileşkännän soñ tözeleşne tuqtatuın iğlan itkän ide. Bügen Patten süzçese Diego de Ojeda bu mäs'älä Yewropa Berlegen äle dä borçıy dip belderde. Yewropa Berlegeneñ Ukraina bäysezlegen genä tügel, berbötenlegen dä yaqlawı turında äytep torunıñ kiräge yuq. Häm şul yaqtan qarağanda, Ukraina belän Rusiä, şulay uq tağın 2 däwlät tarafınnan sintäber ayında urtaq iqtisadıy tirälek buldıru turında kileşü imzalanğannan soñ, ber tarafnıñ ikençe tarafta yanaw bularaq qabul itelüçe beryaqlı ğämällärgä kereşüe ğäcäplänü uyata dide Patten süzçese.
Şulay da ul, Yewropa berlege bu bäxäsne Ukraina belän Rusiä arasındağı, konstruktiv söyläşülär aşa çişelergä tieşle ikeyaqlı mäs'älä dip sanıy dide.
Yewropa Berlegeneñ ber räsmie isemen atamaw şartı belän Ukraina Rusiäneñ damba tözeleşen çınnan da tuqtatuına tulısınça uq ışanmıy kebek dip belderde häm ägär dä Rusiä tözeleşne söyläşülärgä qädär ük tämamlasa wäzğiät Rusiä faydasına üzgäräçäk dide.
Anıñ äytüençä, Yewropa Berlege Tuzla utarın Ukraina cire dip sanıy.
