Accessibility links

якшәмбе, 11 декабрь 2016, Казан вакыты 13:08

Mintimer Şäymiev İrek Mortazinnı tıñlarmı?


Düşämbe könne Tatarstannıñ säyäsi tormışında beraz ğına tınlıq urnaştı. Zur oçraşular, ähämiätle belderülär küp bulmadı. Saylaw aldı kampaniäsen, radio, televideniedä yasalğan çığışlarnı isäpkä almağanda. Oppozitsion yäki xakimiättän bäysez nämzätlär arasında Yevraziä firkäse wäkile Fändäs Safiullin, Yabloko wäkile İrek Mortazin, şulay uq Kreml'gä yaqın bulğan Narodnaya partiä wäkile Flürä Zıatdinova xalıq arasında kürengäli başladı. Fändäs Safiullin düşämbe könne üzeneñ saylaw aldı programması belän Tatarstan radiosı aşa çığış yasadı. İrek Mortazin şähär trolleybuslarına kerep, xalıq belän oçraşıp, sorağan keşelärgä üzeneñ “Posledniy romantik” digän kitabın taratıp yöri. Şunısı ğäcäp, Yabloko firkäseneñ Qazan bülekçäse İrek Mortazinğa tügel, ä matdi yaqtan xälleräk başqa kandidatqa yärdäm itä dilär. Härxäldä, İrek Mortazinnıñ portretları şähär uramnarında elenep tormıy. Xäzergä Qazannı İvan Graçev, Ayrat Xäyrullin, Aleksandr Sapogovskiy kebek kandidatlar çat sayın bizäp toralar.

Düşämbe könne, säğät 11dä, Qazannıñ Bauman uramında piket buldı. Piketqa kilüçelärneñ kübese – studentlar. Anısı ğäcäp tä tügel, çönki 17nçe noyäber – Xalıqara studentlar köne. Piketta qatnaşuçılar Vladimir Putinğa häm Mintimer Şäymievkä möräcäğät itälär. Ämma bu yäşlär xakimiätkä, Tatarstan häm Rusiä prezidentlarına qarşı tügel. Ä alarnıñ säyäsi qiblasın yaqlıylar. Şul uq piketta İrek Mortazin Mintimer Şäymievkä yazğan möräcäğäten jurnalistlarğa tarattı. Ul Şäymievnı Däwlät Duması deputatlığına nämzät buludan baş tartırğa çaqıra. Prezident eşenä qaytsağız, Berdäm Rusiä firqäsen yaqlawçılarnıñ sanı tağın da artır, dip uylıy İrek Mortazin.

Rimzil Wäli

XS
SM
MD
LG