Accessibility links

якшәмбе, 4 декабрь 2016, Казан вакыты 03:05

Mädäniät xäbärläre.


Uzğan comğada Tatarstannıñ xalıq şağire Rawil Fäyzullinnıñ tuğan awılı Yulsubino urta mäktäbenä Rawil Fäyzullin iseme birelü tantanası uzdı. Kiçädä şiğerlär uqıldı, qotlaw süzläre yañğıradı. Rawil Fäyzullin isemendäge urta mäktäp uquçıları qunaqlarğa şağirneñ iñ matur şiğri yulları çigelgän qulyawlıq büläk itte.

Şul uq könne Balıq bistäse rayon mädäniät üzägendä tantanalı kiçä ütkärelde.Anda rayonnıñ barlıq tarmaqlarınnan wäkillär häm Qazannan kilgän xörmätle qunaqlar qatnaştı.Foyeda rayondağı här mäktäp yaqtaşları Rawil Fäyzullinğa bağışlap stengazeta elep quyğan ide.

15nçe noyäber şimbä könne “Duslıq” yortında Äzerbäycan şağire Gias Hämidneñ tatar telendä dönya kürgän kitabın täqbir itü kiçäse uzdı. Qazanda yäşäwçe äzerbäycan şağireneñ kitabı “Araz ağa, canğa qağa” dip atala. Älege kitaptağı Gias Hämidneñ äzerbaycan telendäge şiğerlären Näcibä Safina tatarçağa tärcemä itkän. Bu kitap Tatarstan-Äzerbaycan xalıqları duslığın gäwdäländerüçe milli-mädäni moxtariät oyışuğa 15 yıl tulu xörmätenä “Keşe xoquqları” näşriäte üzägendä näşer itelgän.

Şulay uq, äytep kitüebezçä, 16nçı noyäberdä S.Säydäşev isemendäge Zur Konsertlar zalında Tatarstannıñ xalıq artistkası Klara Xäyretdinovanıñ yubiley benefis kiçäse uzdı. Klara Xäyretdinovanı qotlarğa TDS räise Färit Möxämmätşin kilgän ide. Ul mäşhür cırçığa Mintimer Şäymievnıñ isemennän “Räxmät xatın”tapşırdı.

Konsertnıñ ikençe bülegendä Klara Xäyretdinova uqıtqan studentlar qatnaştı. Yubilyarnıñ qızı Aygöl fortepianoda uynap änisen qotladı. Ä Klara Xäyretdinova härwaqıttağıça ilham, ostalıq belän romanslar, ariälar, xalıq cırların başqardı. Kiçäne bilgele artist Viktor Şäräfetdinov häm Tatarstannıñ atqazanğan mädäniät xezmätkäre, tıñlawçılarıbızğa yaxşı tanış bulğan Näzifä Kärimova alıp bardılar.

Azatlıq radiosı, Qazan , Mälikä Basıyr.

XS
SM
MD
LG