Accessibility links

дүшәмбе, 5 декабрь 2016, Казан вакыты 15:44

BTK uzdırğan seminar Rusiä töbäklärendä eşläwçe tatar jurnalistlarınıñ problemaların çişärgä yärdäm itärme?


Tatarlar küpläp yäşi torğan Rusiä töbäklärendä eşläwçe tatar jurnalistları öçen seminarlar uzdıru Bötendönya tatar kongressı Başqarma komitetınıñ eş yünäleşendä möhim urın alıp tora. Tatarstan Respublikası häm kongress tarafınnan ütkän yıllarda töbäklärdäge gazeta redaksiälärenä kürsätelgän texnik yärdäm uñay näticälär birde. Urınnarda tatar basmaları, radio-teletapşırular redaksiäläre cirle byudjettan tieşle külämdä finanslanmaw näticäsendä bik qıyın şartlarda eşlilär, gazetalarnıñ çığaru sanı kimi, radio häm teletapşırularnıñ efir waqıtı qısqartıla, xezmät xaqı tübän, bu säbäple redaksiälärne kadrlar belän tuplaw problema bulıp tora, zamança kompyuterlarnıñ da citmäwe eştä qomaçawlıy. Näticädä gazetanıñ, tapşırularnıñ sıyfatı tübänäyä, bu inde üz çiratında mäğlümat çaralarınıñ üsep kilüçe buınnıñ taläplärenä täñgäl kilmi, milli mäğlümat çaralarınıñ tärbiäwi role kimi, xalqıbıznıñ üzañın üsterügä kitermi. Bu häm başqa küp kenä problemalar turında Qazanğa cıyılğan tatar jurnalistları täfsilläp söyläde. Bu xaqta «Azatlıq» radiosın daimi tıñlawçılar xäbärdar, Qazan xäbärçeläre täfsille mäğlümat birde.

Tatar massaküläm mäğlümat çaralarınıñ töp burıçı itep tatar xalqınıñ berdäm informatsion kiñlegen buldıru mäs`äläse tora. Töbäqara berläşüne köçäytü maqsatın alğa quyıp, şulay uq cirle mäğlümat çaralarınıñ uñay eş täcribäse belän urtaqlaşu niäte belän jurnalistlar seminarnıñ ikençe könen Udmurtiä başqalası İjaw şähärendä uzdırdı.

Biredä tatar jurnalistları başta respublika xakimiäte binasında matbuğat häm mäğlümat ministrı Sergey Vasilyev, anıñ urınbasarı Näzirä Kasimova, milli säyäsät ministrı Vladimir Zavalin, başqa belgeçlär belän «tügäräk östäl» söyläşüendä qatnaştı. Sergey Vasilyev tatar xalqınıñ Udmurtiä respublikasında totqan urını turında cılı süzlär äytep, tatarlarnıñ respublika iqtisadına kertkän öleşen bilgeläp, milli mäğlümat çaralarınıñ üz xalıqnıñ üzañın üsterügä kertüdä uñışlı eşläwenä dä basım yasadı. Tatar telendäge radio-teletapşırularnı, «Yañarış» basmasın respublika byudjetınnan finanslanuı turında assızıqladı. Mäsälän, 12 bitle atnalıq tatar telendäge basmanıñ yäşäyeşe öçen ike millionnan artıq aqça bülenä. Bu summa başqa ber genä töbäktä dä yuq. Alarnıñ küp öleşen milli canlı eşquarlar üz cilkäsenä ala. Şulay uq redaksiäne texnik yaqtan tä'min itü öçen dä — zamança fotoapparat, kompyuterlar, ciñel maşina alu öçen byudjettan aqça bülep birgän. Ütkän yılda efirğa çığa başlağan «Moya Udmurtiä» kanalında kileşü buyınça Tatarsannıñ «Yaña ğasır» televizion kanalındağı irtänge tapşırularnı cirle mäğlümat belän tulılandırıp birüne dä gazeta xezmätkärläre üz cilkäsenä alğan. Bu eşne tağın da sıyfatlıraq başqarunı küzdä totıp, «Yañarış» gazetası redaksiäse xäzer mäğlümat üzäge itep tözelde, häm ştatqa tağın dürt keşe qabul itelde, dide Sergey Vasilyev.

Milli säyäsät ministrı Vladimr Zavalin Udmurtiä respublikasında yäşäwçe xalıqlarnıñ milli ixtiäcların qänäğätländerü maqsatı belän älege ministrlıqnıñ oyıştırıluın, anda terkälgän 26 milli-mädäni, ictimaği oyışmalar belän tığız elemtädä eş alıp barıluın, qaysıber problemalarnı xäl itü buyınça xätta milli oyışma citäkçeläre respublika prezidentı Aleksandr Volkov belän dä oçraşıp söyläşüläre turında citkerde. Respublikada qabul itelgän milli säyäsät konsepsiäsen tormışqa aşıruda milli informatsiä çaraları, milli oyışmalar yärdäm itülären assızıqladı. Respublikada milli büleneş yuq, barlıq millätlärneñ mänfäğätlären qayğırtıp yäşärgä omtılabız dip, şulay da, tatar oyışmalarınıñ eşenä tuqtalıp, täfsille mäğlümat citkerde.

Törle çaralar uzdıru öçen milli oyışmalarğa byudjettan aqça bülenep birelüe, ministrlıqnıñ tulı xoquqlı buluı da regionnardan kilgän jurnalistlarnı ğäcäpländerde. Zavalin, şuşındıy ministrlıqnıñ Rossiä külämendä dä buluın millätlärgä qaraşnı üzgärter ide digän fikerdä.

Audio

Oçraşuda Tatar ictimaği üzäge räise Flün Mirzayanov, Aqsaqallar cämğiäte citäkçese Şihabetdin Sadıqov ta üz oyışmaları eşläre belän tanıştırdılar. BTK Başqarma komitetı räise urınbasarı İldus Xadiullin kongress tarafınnan başqarğan eşlär turında citkerde, annan soñ qunaqlar törkemnärgä bülenep, «Yañarış» mäğlümat üzäge, respublikada äle genä açılğan «Moya Udmurtiä» teleradiokanalı eşe belän tanıştı. Seminarğa näticä yasap, İldus Xadiullin bolay dide:

Audio

Mordoviä radiosında tatar tapşıruları alıp baruçı Räşidä İpqayıva häm gazeta çığaruçı İrek Bikkinin Udmurtiäge xällär belän tanışıp, üzläreneñ nindi ayanıç xäldä bulularınnan tağın da körsenep quydılar.

Audio

Dörestän dä, başqalarnıñ da eş şartları belän tanışıp, şunda ğına näticä yasarğa mämkin bulaçaq. A ul mömkinlek bulaçaq — kiläse oçraşu Tübän Novgorodta bulaçaq dip xäbär itte BTK BK xezmätkäre Gölnaz Şäyxi.

Xämidä Ğayfullina, Udmurtiä.

XS
SM
MD
LG