Accessibility links

Yevropa Berlege tışqı eşlär ministrları Ğiraqta xakimiätne ğiraqlılarğa tapşıru eşen tizlätergä çaqıra


Britaniä häm Fransiä tışqı eşlär ministrları, şulay uq Yevropa Berlegeneñ tışqı säyäsät başlığı Javier Solana, Ğiraqtağı xakimiätne ğiraqlılar qulına tapşıru eşen tizlätergä çaqıra. Britaniä tışqı eşlär ministrı Jack Straw – eşne tizlätü yulın tabırğa kiräk, dide. Brusseldä cıyılğan Yevropa Berlege tışqı eşlär ministrları qarşında çığış yasağanda, Straw, Ğiraqta iminlek mäs'äläse äle dä köntärtibendä qala, dip belderde. Solana, atna azağında Germaniä basmasına birgän äñgämäsendä, Ğiraqlılar üz ilendäge xakimiätne üz qullarına "aldan planlaştırılğannan irtäräk alırğa tieş" digän ide. Şulay uq Fransiä tışqı eşlär ministrı Dominique de Villepin da, elek äytkän süzlären qabatlap, yıl axırına qadär Ğiraqta waqıtlı xökümät tözelergä tieş, dip belderde.

Läkin kiçä, amerikan prezidentı George Bush, Quşma Ştatları tarafınnan bilgelängän Ğiraq İdarä Şurasınıñ küçeş çorı xökümäten iün ayına tözü niäten xuplıym, dip beldergän ide.

Bügen Yevropa Berlege tışqı eşlär ministrlarınıñ Brusseldä açılğan cıyınında Ğiraq, İran, häm Yevropa Berlegeneñ İsraelgä qarata säyäsäte turında süz bara. Utırışta şulay uq İsrael tışqı eşlär ministrı Silvan Şalom da qatnaşa. Küptän tügel Yevropada uzdırılğan fiker beleşü kampaniäse waqıtında , xalıqnıñ yartısınnan kübräge – İsrael dönyadağı iminlekkä qurqınıç tudıra dip cawap birgän. Şalom, İsraelneñ bu mäs'älägä borçıluın citkäräçäk dip kötelä. Bügen ük, Şalom, ägär dä Yevropa Berlege Yaqın Könçığışta tınıçlıq urnaştıru eşendä qatnaşırğa däwam itergä uylasa, İsrael-Fälestin nizağında balans totarğa tieş, dip belderde.

Yevropa Berlege, İrannıñ üzendäge atom programmaların tikşerergä röxsät birüenä basım yasıy. Yevropa Komissiäseneñ tışqı eşlär komitetınıñ wäkile Emma Udwin, Berlek, İrannıñ Atom Töş Qoralnı cäyeldermäw kileşüenä östämä protokolğa qul quyuın teli, dip belderde. Utırışqa qatnaşqan İran Yuğarı Milli İminlek Şurası başlığı Hassan Rohani, Yevropa Berlege ministrları belän oçraşqaç, İran turında Berläşkän Millätlär Oyışması İminlek Şurasına xisap birergä ber säbäp tä yuq, dide.

Yevropa Berlege tışqı säyäsät başlığı Javier Solana, İrannıñ protokolğa qul quyaçağına ömet belderde: "İranlılar atom töş qoral citeştermider, digän ömettä qalabız, läkin bezneñ barı tik bu telägebez genä bar. Alar belän qayber kileşülärgä ireştek, bu kileşülär ütäler, dip ömetlänäbez, " dide Solana.

Cıyında Yevropa Berlegenä kergän 15 ilneñ, häm kiläse yılda yaña äğza bulaçaq 10 däwlätneñ tışqı eşlär ministrları qatnaşa, irtägä alarğa amerikan däwlät sekretare Colin Powell da quşılaçaq.
XS
SM
MD
LG