Gazetanıñ yazuınça, kitap Kremldä qänäğätsezlek tudırğan häm şulay uq Putin xakimiätkä kilgännän birle senzura köçäyde digän fikerne dä quätliy. Putin prezident itep saylanğannan birle Kremldän informatsiä ağımı bik çiklände häm bu moña taläpne köçäytte. Trebugova tutaş Kremlneñ eçke dairäsendä eşlävçe jurnalistlar yä ğäädättäntış baç iyüçän bulırğa yäisä akkreditansiäne yuğaltu belän täväkkälek itärgä tieşlär dip yaza. Anıñ raslauınça, Putin kertkän sistemağa kürä, üzenä quyılaçaq barlıq soraular başqa üzeneñ mätbuğat väkilläre tarafınan raslanırğa tieş. Trebugova Putin belän 1998-nçe yılda, ul äle FSB başlığı bulğanda, niçek ikävläp töşke aşta buluları xaqında täfsille yazğan. Putin Yaña yılnı anıñ belän ütkärergä teläven äytkän. Kitapnı bastırıp çığarğan Ad Margunem näşriäte direktorı Aleksander İvanov bez bastırğan 10 meñ nösxä ber kön eçendä tulısınça satıldı, kiläse ike köndä tağı da 30 meñ satarbız dip kötbez dip belderde. Anıñ süzlärençä, Kremldäge ber xäbärçe prezident administratsiäse 100 nösxä satıp aldı häm alar anda yazılğannar belän ber dä qänäğät tügellär dip äytkän. Trebugova bu kitapnı Russiädä Putin xakimiäte çorında informatsiä ireklegeneñ niçek çiklängän buluın kürsätü maqsäte belän yazğanın belderä. Monı Rusisäneñ dävlät kontrole äle yomışağıraq bulğan NTVnıñ kitap turındağı programmanı aldan iğlan itep , anı Yıraq Könçığışqa tapşırğan bulsa da, Mäskävdäge tapşırunı soñğı minutta tuqtatuı da kürsätä. Televideniä räsmiläre qarar politik tügel dip beldersälär dä moña ışanu qıyın. Kreml turındağı istäleklär Dumağa saylaualdı kampaniäsendä dä urın taptı. Uñ Köçlär Berlege citäkçese Nemtsov kitap turındağı programmanı tuqtatu Russiädäge senzurağa misal bulıp tora dip beldere. Carneigie İnstitutı xezmätkäre Lilia Şevtsovanıñ fikerençä, prezident komandasınıñ informatsiä ağımı östennän kontrolen nığıtuı, Kremlnologiäneñ ähämiäten yañadan kütärgän. Anıñ süzlärençä, Putin xakimiätkä kilgännän soñ, Kreml turındağı açıqlıq kimegän.
Färit İdelle, Praga.
Färit İdelle, Praga.