Accessibility links

Кайнар хәбәр

«Tatarstan – Yaña ğasır» kompaniäse litsenziä aldı


Moña qädär «Tatarstan-Yaña ğasır» radiosınıñ 91,5 metrlı Qazandağı tapşıruları efirğa çıqsa da, anıñ tieşle räweştä alınğan litsenziäse yuq ide. Xäzergä sınaw räweşendä barğan tapşırular öçen yışlıqlarnı barı tik konkurs aşa Mäskäwdä genä alıp bula. Çärşämbe könne, 19nçı noyäberdä, Mäskäwdä Rusiä mäğlümat ministrlığında yışlıqlar konkurs komissiäseneñ çirattağı utırışı buldı. Bäygegä quyılğan yışlıqlar arasında Qazanda, Çallıda, Tübän Kamada yañğırıy torğan FM radiosı yışlıqları häm Tübän Kamadağı televidenie kanalı da quyılğan ide. Tatarstan wäkilläre tieşle dälillärne kiterep, konkursta ciñep çıqtılar. Şulay itep, Yaña ğasır radiosı häm anıñ Çallı, Tübän Kama töbäklärendäge retranslyatsiäse xäzer qanunlı räweştä efirğa çığa. Älege yañalıqnıñ Azatlıq radiosı tapşıruları taraluğa da tä`sire bar. Çönki Yaña ğasır radiosı dulqınnarında kiçke säğät 11dän 12gä qädär häm irtänge säğät 5tän alıp 6ga qädär Azatlıq tapşıruları retranslyatsiälänä.

Süz uñayınnan şunı da äytergä kiräk. Sişämbe kiçendä Qazandağı radiotapşırğıçlar Azatlıq radiosı tapşıruın birmäde. Bezneñ tapşırularnı künekkän waqıtta tıñlarğa öyrängän tıñlawçılar Azatlıqnı işetä almadı. Bez alar aldında ğafu ütenäbez. Çärşämbe könne bulğan özeklek texnik säbäplär arqasına kilep çıqtı. Azatlıq tapşıruların sputnik aşa cibärüçe caylanmanıñ yışlığı üzgärgän, läkin Qazandağı texniklar belän bu tieşençä kileşterelmägän bulğan.

Televidenie häm radiotapşırular yışlıqları texnik problema bulsa da, bu mäs`äläneñ säyäsi yağı da bar. Här xalıq üzeneñ tuğan telendä tapşırular tıñlarğa häm qararğa xaqlı. Xalıqara xoquq normaları da, xätta Rusiä qanunnarı da şunı taläp itä. Ämma, yış qına yä tapşıru öçen aqça yuq, yä yışlıqlarınıñ qüäte citmi. Töbäklär üsterügä yärdäm itü waqıfı prezidentı, Başqortstan prezidentlığına nämzät Sergey Veremeyenko «İzvestiä» gazetasınıñ uzğan şimbä, 15nçe noyäber sanında interv’yu birgän. Ul milli mäs`älälärne xäl itü öçen Başqortstanda tatarça gäcitlär, jurnallar, kitaplar bastıru häm taratunı arttırırğa kiräk, dip sanıy. Sergey Veremeyenko Tatarstannan tatarça matbuğatnı Başqortstanda taratunı oyıştıru mömkinlegen äytä. Şulay uq, anıñ fikerençä, «Tatarstan – Yaña ğasır» televidenie tapşıruların häm Bolğar-FM radiosı signalın Başqortstanda retranslyatsiäläw öçen çara kürergä kiräk. Älege mäqälä basılıp çıqqanğa 4 kön ütep kitsä dä, radio häm teletapşırularnı Başqortstanğa da işetterü turında Qazan mäğlümat çaraları ber süz dä äytmäde äle. Bälki Qazan häm Ufa jurnalistları Veremeyenkonıñ «İzvestiä» aşa taratqan täqdimnäre turında işetmägänder.

Gölnaz İlgizär

XS
SM
MD
LG