Accessibility links

якшәмбе, 4 декабрь 2016, Казан вакыты 17:29

Saylawlarğa qädär 17 kön qaldı. Nämzätlär här efir minutınnan da faydalana


Nämzätlärneñ öndäw häm çığışlar öçen 16 ğına täwlek bar. Çönki saylawğa 24 säğät qala, qanun böten säyäsi çığışlarnı tämamlarğa quşa. Däwlät televidenie kanallarında birelä torğan tüläwsez minutlarnıñ barısı da diärlek faydalanıla. «Yaña ğasır» kanalı xäbär itkänçä, nämzätlärneñ aktivlığı bik zur. Läkin siräk kenä bulsa da, alarnıñ efir waqıtına kilmi qalu oçraqları da bar. Mäsälän, äle sişämbe könne genä «Xalıq partiäse» wäkilläre televideniedäge debatlarğa kilep tormağan. «Yaña ğasır» kanalı 1 ayğa 720 tüläwsez minut birä, häm ul 48 nämzätkä bülengän. Şunıñ östäwenä 23 firqä dä bar. Barısın da sanap, bülep betergäç, çığışlar öçen 2-3 minut qına turı kilgän. «Yaña ğasır» kanalı 18.10 häm 20.40 minuttan başlap efirnı saylanırğa teläwçe nämzätlärgä birsä, «Tatarstan» kanalında isä säyäsätçelär köndezge efirda 11.40 minutta tamaşaçılar aldında çığış yasıy başlıy.

Üze turıda töşerelgän reklamanı efirğa birergäme, ällä turı efirda köndäşlär belän bäxäsläşep utırırğamı – monı nämzät üze xäl itä. Turı efirda fikereñne señdererlek itep söyläw, professional äzerlek sorağanğa kürä, qayber nämzätlär çığışların aldan yazdırıp quya, läkin üz köçenä ışanıp kamera aldına çığıp söyläwçelär dä bula. Teledebatlarda qaynar bäxäslär alıp barıla dip äytep bulmıy. Söyläşü nämzätlärneñ üz qaraşları belän tanıştıruğa häm 1-2 sorawğa cawap birügä qaytıp qala. Saylaw isemleklärendä , sotsial qaraşlı firqälär östenlek itkängä, nämzätlärneñ çığışlarında kübesençä sulçılar şiğärlärenä urın birelä. Sulçılar da, uñ köçlär dä, urtalıqnı yaqlawçı firqälär dä räsmi xakimiätlärne tänqitläw belän mäşğül. Çığışlarda neft’tän kilgän tabışnı döres itep bulu, xosusıylaştıru näticäläre, Çeçnädäge suğışnı beterü, äzerlekle armiäne buldıru häm başqa şundıy temalar kütärelde. Tatarça söyläwçe nämzätlär bik siräk oçrıy. Kübesençä, alar ike teldä, yäki urısça ğına söyläşergä tırışalar. Läkin säyäsi reklama ike teldä dä alıp barıla. Tülängän efir waqıtın telekanallar mul itep birä. «Uñ köçlär berlege», «Xalıq partiäse», «Berdäm Rusiä»neñ, ayırım nämzätläreneñ reklamaları televidenie efirında yış kürenä. Tüläwle efir waqıtların küpçelek firqälär alğan ikän, barı tik kommunistlar firqäse wäkilläre genä tüläwsez minutların ğına faydalanırğa bulğan ikän.

Läkin küpme genä reklama barmasın, Telekanallar ütkärgän fiker soraştırular kürsätkänçä, saylawçılarnıñ kübese nindi okrugta nindi nämzätneñ buluın belmi häm firqälärneñ programmaların ber-bersennän tiz genä ayıra almıy.

Bikä Timerova.

XS
SM
MD
LG