Accessibility links

сишәмбе, 6 декабрь 2016, Казан вакыты 19:13

Gruziädäge xakimiat krizisı tiränäyä - oppozitsiä Tbilisigä marş äzerli


Gruziädäge xakimiat totrıqsızlığı yaña çorğa kerä - andağı oppozitsiä xäzer maqsat itep prezident Şevardnadzeneñ urınınnan kitüwenä ireşüne quya. Oppozitsiä citäkçeläre arasında iñ abruylı sanalğan Mixail Saakaşvili şul maqsatta bar il buylap uramnarğa meñlägän keşene çığaraçağın wäğdä itä. Sişämbedä oppozitsiä şuşı planına beraz üzgäreşlär kertsä dä, Gruziädäge wäzğiat kiyerenke bulıp qala birä.

Gruziä oppozitsiäse üz köräşendä töp iğtibarnı älegä qädär noyäbr başında uzğan parlament saylawlarınıñ näticälären döresläwgä birgän bulsa, xäzer inde moña bik ışanmıy höcümne prezident Şevardnadzeneñ üzenä qarşı başlarğa buldı. Mäğlüm ki, oppozitsiädäge berniçä partiä ilneñ xäzerge xakimiaten tawış birü näticälären üz faydasına bozıp iğlan itüdä ğäyepläde häm saylawlardağı ciñüne üzenä, yäğni oppozitsiägä birüne taläp itte. Läkin bolar barısı da xäzer ütkändä qaldı, Şevardnadzegä qarşı çıqqan citäkçelärneñ berse, "Demokratik Front" milli xäräkäte başlığı, berük waqıtta başqala Tbilisineñ şähär şurası räise bulıp torğan Mixail Saakaşvili Gruziädä xakimiat öçen barğan köräşneñ yaña çorın iğlan itä. Oppozitsiä bar il buylap soñğı distä yıl eçendä iñ zur bulır dip kötelgän uram cıyınnarı ütkärüne planlaştıra. Başta monı kiläse comğağa bilgelägännär ide, annarı çärşämbegä küçerdelär, läkin sişämbedä şuşı küzätü äzerlängändä oppozitsiäneñ konkret plannarı xaqında anıq mäğlümat yuq ide. Eş şunda ki, Saakaşvili ilneñ törle töbäklärennän başqala Tbilisigä marş oyıştırırğa häm anda xalıqnı bar ildän tuplarğa teli. Ul üze tarafdarları belän Gruziäneñ könbatışındağı Zugdidi şähärennän başqalağa taba sişämbe kiçen çığarğa tieş ide, ämma kilgän xäbärlärgä qarağanda, yulğa çığu kiçekterelgän. Oppozitsiä moña yaxşıraq itep äzerlänergä teli dip belderelä. Ul arada Gruziä başqalasına düşämbe kiçen Quşma Ştatlar däwlät sekretare yardämçeseneñ urınbasarı Lynn Pascoe kilde. İldäge kiyerenkelek gruzinnar arasında ğına tügel, anıñ Rusiä, Törkiä kebek kürşeläre, xätta Quşma Ştatlarda da zur borçılu uyata. Kavkaz yağı bolay da totrıqsızlıq kiçerä, moña xäzer Gruziä dä östälsä, bu bar töbäktäge kiyerenkelekne arttıraçaq. Prezident Şevardnadze häm anıñ töp köndäşläre belän ayırım söyläşülär ütkärgännän soñ amerikan wäkile bolay dip belderde:

Audio, Lynn Pascoe

"Bezneñ mänfäğätebez, Gruziä xalqına häm xökümätenä bügenge şartlarda mömkin bulğan iñ qulay saylawlarnı ütkärügä yardäm itüdän ğibarät. Bezneñ öçen, tawış birü tiräsendä kilep çıqqan mäs''äläne çişü bik tä möhim. Läkin monı niçek eşläw yulların öyrätü bezneñ eş tügel" di amerikan däwlät sekretare yardämçeseneñ urınbasarı Lynn Pascoe. Ul barı tik, krizis taraflar arasında söyläşülär başlaw aşa ğına xäl itelä ala dip isäpli. Läkin oppozitsiä citäkçeläre xäzer prezident Şevardnadzeneñ urınınnan kitüwen taläp itkäç, andıy söyläşülär öçen nigez taraya. Oppozitsiädän barı tik parlamentnıñ elekke räise Nino Burcanadze ğına prezidentqa qarşı çığışlar yasawdan totılıp tora. Eduard Şevardnadze üze, oppozitsiä citäkçeläre belän söyläşülärne, alar şul taläbennän waz kiçkän oçraqta ğına başlayaçağın äytä.

Audio, Eduard Şevardnadze

"Ägär dä bu yardäm itä ala ikän häm ägär dä alar üzläreneñ qayber axmaq taläplärennän waz kiçsä, min alar belän oçraşırğa äzer, soñğı mömkinlek bulıp barıber ilebezneñ mänfäğätlärennän çığıp eş itü qala" dip belderä Gruziä prezidentı Şevardnadze.

Kärim Kamal, Praga
XS
SM
MD
LG