Accessibility links

дүшәмбе, 5 декабрь 2016, Казан вакыты 23:48

Xalıqara Atom Agentlığı İrannıñ atom programmasın tikşerer öçen cıyıla


Yevropa Berlegeneñ tışqı eşlär komissionerı Chris Patten, Quşma Ştatlar häm Yevropa Berlege arasında İrannıñ atom programması tiräsendäge fiker ayırmalıqları xäl iterlek, dip belderde. Fransiä , Britaniä häm Germaniä Xalıqara Atom Agentlığınıñ idarä şurasına İrannı 18 yıl buyına üzeneñ atom programmasın yäşerep totuda ğayepläp rezolyutsiä ölgesen äzerläde.

Bügen İrannıñ yuğarı däräcädäge iminlek räsmiläre "İran Xalıqara Atom Energiäse Agentlığınıñ uran bayıtu programmasın tuqtatırğa digän färmannarın ütämiäçäk" dip belderde. İrannıñ Yuğarı Milli İminlek Şurası başlığı Hassan Rowhani, İran berençe adım yasap, üz teläge belän uran bayıtu programmasın tuqtatıp toraçağı turında iğlan itte, läkin uran bayıtu eşlären tuqtatunı taläp itkän nindi dä bulsa dokument – qabul itelmiäçäk, dide.

İrtägä Xalıqara Atom Enegriäse Agentlığı cıyılıp İrannıñ atom programmasın tikşeräçäk. Quşma Ştatlar, İrannı – Atom Qoralın Cäyeldermäw Kileşüen bozuda ğayepläp Berläşkän Millätlär Oyışması tarafınnan sanskiälär bilgeläwgä basım yasıy. Läkin qayber illär, şul sanda Yevropa Berlegeneñ tışqı eşlär ministrları eşneñ bolay tirängä kerüen telämi. İran süzlärenä qarağanda, atom programması barı tik tınıç maqsatlarda qullanıla. Quşma Ştatlar häm qayber könbatış däwlätläre İran atom programmasın qoral citeşterüdä qullana digän farazlar belderä.

Bügen İtaliägä säfären tämamlağan İsrael premyer-ministrı Ariel Şaron, İtaliäne, Yevropa Berlegeneñ prezidentı bularaq, İranğa atom programması tiräsendäge wazğiätne açıqlarğa digän basım yasarğa çaqırdı. Bu xaqta Şaron İtaliä tışqı eşlär ministrı Franco Frattini belän bulğan oçraşu waqıtında beldergän.

XS
SM
MD
LG