Accessibility links

чәршәмбе, 7 декабрь 2016, Казан вакыты 13:44

Tatarstanlılar Perm`dä qunaqta


Bu könnärdä Perm` ölkäsendä Qazan qunaqları bar. Alar ölkädä 19-20nçe noyäberdä ütä torğan Tatar mäğärife könnärendä qatnaştı. Bu çaranı Tatarstannıñ Mäğärif ministrlığı häm Perm` ölkäseneñ mäğärif departament oyıştırdılar. Tatar mäğärife könnäre ike töbäk arasındağı mäğärif ölkäsendäge kileşü nigezendä ütkärelde. İsegezdäder, respublikanıñ Mäğärif ministrlığı Rusiäneñ küp kenä töbäkläre belän şundıy kileşülär tözegän ide. Alarnıñ şaqtıyında Tatar mäğärife könnäre uzdırıldı da. Bu çaralarnıñ maqsatı – Tatarstannan çittä yäşäwçe millättäşlärebez belän mäğrifätçelek eşen alıp baru. Älege könnär qısalarında Tatarstannan kilgän küpsanlı qunaqlar yıraq cirlärdäge tatarlar belän oçraşa, alarğa tatarça kitaplar, däresleklär büläk itä, millättäşlärebezneñ xäle, tormışı belän tanışa, töbäklärdä tatar mäğärifeneñ torışı xaqında beleşä. Şunısın da äytergä kiräk, Mäğärif ministrlığınıñ mäğlümätlärenä qarağanda, xäzerge köndä Rusiä töbäklärendäge tatar mäktäpläreneñ häm tatar telen uqıtuçı mäktäplärneñ sanı 90 yıllar belän çağıştırğanda üskän. Monda ministrlıq ütkärä torğan älege çaralarnıñ da tä’sire yuq tügelder dip ömetlänäse kilä.

Noyäber axırında Tatar mäğärife könnären ütkärü çiratı Tatarstannan ällä ni yıraq ta urnaşmağan Perm` ölkäsenä citte. Äytergä kiräk, ölkädä tatarlar şaqtıy yäşi, anda tatar telen öyränü belän dä xällär çağıştır,aça uñışlı tora. Oktäber ayında ütkän Tatarstan Mäğärif ministrlığınıñ kollegiäsenä Perm`neñ mäğärif departamentı wäkile dä kilgän ide. Anıñ süzlärenä qarağanda, ölkäneñ 73 mäktäbendä tatar tele uqıtıla, alarda 6 800 bala belem ala. Şulay uq, 1435 tatar balası tuğan telen 53 balalar baqçasında öyränü mömkinlegenä iä. Şuña kürä dä, ölkädä ütkärelgän Tatar mäğärife könnäreneñ ähämiäte bik zur.

Älege çarada qatnaşu öçen respublikanıñ Mäğärif ministrı urınbasarı Lyudmila Noğmanova häm ministrlıqnıñ töbäkara xezmättäşlek bülege citäkçe Änisä Morozova citäkçelegendäge delegatsiäse, artistlar häm cırçılar bardı. Delegatsiä wäkilläreneñ 19-20nçe noyäber könnärendä eşläre bik tığız buldı. Şuşı 2 kön eçendä alar küp kenä çaralarda qatnaşıp, şaqtıy eş başqarıp ölgerdelär. 19nçı noyäberdä Tatarstan qunaqları Barda, Kungur, Oktäber, Perm` rayonnarında buldılar. Monda alar xakimiät citäkçeläre, mäğärif oyışmaları wäkilläre, uqıtuçılar, ata-analar belän oçraştılar, könüzäktä torğan mäs’älälär xaqında söyläştelär, älege rayonnarnıñ mäktäplärendä tatar tele häm ädäbiäte buyınça açıq däreslärdä, seminarlarda qatnaştılar. Şulay uq ölkädäge tatar cämäğätçelege belän dä oçraşular uzdı. Comğa könne isä Mäğärif ministrlığı wäkilläre şähärdä ütkärelgän Perm` ölkäsendä tatar mäğärifeneñ aktual’ mäs’äläläre häm üseş yulları dip isemlängän kiñäşmädä qatnaştılar. Ä Tatarstannıñ Mäğärif ministrı urınbasarı Lyudmila Noğmanova ölkäneñ mäğärif departamentı räise Aleksandr Zimin belän oçraştı. Oçraşuda Permneñ tatar-başqort milli-mädäni moxtäriäte wäkilläre dä qatnaştı. Anda süz mäğärif ölkäsendäge ike töbäk arasındağı xezmättäşlekne üsterü turında bardı. Şulay itep, Perm` ölkäsendäge Tatar mäğärife könnäre şaqtıy uñışlı tämamlandı.

Gölnaz İlgizär

XS
SM
MD
LG