Accessibility links

сишәмбе, 6 декабрь 2016, Казан вакыты 03:56

«Berdäm Rusiä» firqäse wäkile Mintimer Şäymiev «SPS» firqäse räistäşe Anatoliy Çubaysnı qabul itte


Anatoliy Çubaysnıñ Tatarstanğa kilergä kim digändä 3 säbäbe bar. Berençedän, Tatarstan Prezidentı belän küreştem, di ul. Şäymiev belän Çubays ike firqä citäkçeläre bularaq küreşkän.«SPS» firqäse räistäşe süzlärençä, «Berdäm Rusiä» firqäse räistäşe uñ köçlärgä teläktäşlek kürsätte häm, Anatoliy Çubays fikerençä, bu süzlärneñ qimmäte bik zur.

RAO «EES» şirkäte citäkçeseneñ Qazanğa kilüneñ ikençe säbäbe – Qazandağı Energetika universitetına yärdäm itärgä teläwe. Anatoliy Çubays äytkänçä, bu xaqtağı qarar da Respublika Prezidentı bülmäsendä qabul itelde. RAO «EES» şirkäte citäkçese energetika ölkäse öçen belgeçlär äzerli torğan şuşı yuğarı uqu yortlarına 100 million sum büläk itüe xaqında xäbär itelde. Aqçalar universitetnıñ yaña binasın tözügä totılaçaq. Bu xaqta ike yaq räsmi kileşü imzaladı. Tatarstan energetika oyışması da bu urtaq proyektqa aqçalata yärdäm belän qatnaşırğa tieş, dip äytelde energetika universitetındağı oçraşuda. Bu büläkneñ saylawlar aldınnan ğına yasaluı jurnalistlarda şik uyattı uyatuın, ämma niçek kenä bulmasın, Energetika universitetı rektorı häm studentlar bik qänäğät qaldı.

Soñınnan ütkärelgän matbuğat konferensiäsendä, Anatoliy Çubays «Tatenergo» oyışmasınıñ RAO «EES» şirkätenä quşılıp baruı xaqında da söyläde. Bu anıñ Qazanğa kiler öçen 3nçe säbäp bulıp tora.

1,5 yıl elek tulısınça däwlätneke bulğan «Tatenegro» oyışması, xäzer RAO «EES» kebek üzgärtep qorıla häm däwlät qatnaşlığı bulğan aksionerlıq cämğiätenä äylänä bara. Ämma älegä, «Tatenergo» belän RAO «EES» arasında söyläşülär tämamlanmağan häm ike yaq ta äle kileşep betmägän.

Jurnalistlar şulay uq, Duma deputatlarınıñ Anatoliy Çubaysnı eştän alırğa tırışlıqlarına mönäsäbäte belän qızıqsındılar. Bu ğämäl inde 64nçe tapqır qılına, häm bu tsirkka tartım uyın, dide Anatoliy Çubays.

Bikä Timerova.

XS
SM
MD
LG